Каннын олон улсын 78 дахь удаагийн кино наадамд Ираны нэрт найруулагч Жафар Панахи-гийн бүтээл “Энэ бол зүгээр л осол байсан” (Yek tasadef sadeh) нэртэй драм кино үндсэн уралдаант хэсгийн шилдэг бүрэн хэмжээний кино-гоор шалгарч, “Алтан далдуу модны мөчир” шагналын эзэн болжээ. Шагналыг бямба гарагт болсон хаалтын ёслолын үеэр гардуулсан байна.

Жафар Панахи өмнө нь ч Каннын кино наадмаас шагнал хүртэж байсан туршлагатай. Тэрээр:

• 1995 онд “Цагаан бөмбөлөг” (Khers nist) киногоор “Алтан камер” шагнал

• 2018 онд “Гурван царай” (Se rokh) киногоор шилдэг зохиолын шагнал

• 2022 онд “Баавгай байхгүй” (Khers nist) киногоор шүүгчдийн тусгай шагнал хүртэж байсан.

Гран-при шагнал буюу хоёр дахь нэр хүндтэй шагналыг Норвегийн найруулагч Йоаким Триер-ийн инээдмийн драм жанрын “Сэтгэл хөдлөлийн үнэ цэн” (Affeksjonsverdi) кино хүртсэн бол шүүгчдийн шагналыг Франц-Испанийн Оливер Лашетийн “Сират”, Германы Маша Шилинскийн “Нарыг ажиглахуй” бүтээлүүд хуваан хүртжээ.

Жүжигчдийн төрлөөр:

• Шилдэг эрэгтэй дүр: Вагнер Мура (“Нууц агент” – Бразил)

• Шилдэг эмэгтэй дүр: Надия Меллити (“Бяцхан Дерниер” – Афсиа Эрзигийн бүтээл)

Бусад гол шагналууд:

• Шилдэг найруулагч: Клебер Мендонсу Фильо (“Нууц агент” – Бразил)

• Шилдэг зохиол: “Залуу ээжүүд” – Жан-Пьер, Люк Дарденн (Бельги)

• Шилдэг богино хэмжээний кино: “Чамайг үхсэнд би баяртай байна” – Тауфик Бархом

• “Алтан камер”: Хасан Хади (“Ерөнхийлөгчийн бялуу” – Ирак)

• Шүүгчдийн тусгай шагнал: Би Ган (“Дахин төрсөн нь” – Хятад)

Хаалтын өдөр Францын зүүн өмнөд хэсэгт цахилгаан эрчим хүч тасалдсанаар кино наадам түр зогссон ч цахилгаан үүсгүүрийн тусламжтайгаар үйл ажиллагааг үргэлжлүүлсэн байна. RTE компанийн мэдээлснээр 160 мянга гаруй өрх цахилгаангүй болсон ба хэргийг зориуд тасалсан байж болзошгүй хэмээн эрх бүхий байгууллагууд шалгаж эхэлжээ.

Эх сурвалж: France 2