УИХ-ын дарга Д.Амарбаясгалангийн санаачилгаар хэрэгжсэн ахлах ангийн сурагчдад санхүүгийн суурь мэдлэг олгох, зохистой хэрэглээ, хуримтлалын дадалд сургах зорилготой “Level up” хөтөлбөр дөрвөн сарын хугацаанд үргэлжилж, хаалтын үйл ажиллагаагаа зохион байгууллаа.

Уг хөтөлбөрт Улаанбаатар хотын зургаан дүүрэг болон Говь-Алтай, Ховд, Орхон, Булган зэрэг аймгийн нийт 5000 гаруй сурагч, олон арван багш оролцсон бөгөөд санхүүгийн боловсролыг энгийн, өдөр тутмын амьдралд ойр байдлаар зааж, хэрэглээнд нэвтрүүлэхэд онцгой анхаарсан байна.

Булган аймгаас тус хөтөлбөрт найман багш, хоёр зуун тавин долоон сурагч хамрагдаж, хөтөлбөрийн хэрэгжилтийн үр дүнгээр гурван багш, нэг сургууль шилдгээр шалгарсан нь орон нутгийн оролцоо идэвхтэй байсныг харуулж байна.

Санхүүгийн боловсролыг наснаас үл хамааран амьдралын чанарт шууд нөлөөлөхүйц амьдрах ухааны суурь чадвар хэмээн тодорхойлж, хөтөлбөрийн хүрээнд сурагчдад төсөв гаргах, зарцуулалтаа хянах, эрсдэлээс сэргийлэх талаар мэдлэг олгож, багш нарыг сургагч багшаар бэлтгэсэн нь цаашдын тогтвортой байдалд ихээхэн хувь нэмэр болох юм.

Хөтөлбөрийн онцлог үр дүнг дурдвал:

• Социал медиа хөгжүүлэлтээр 45 контент бэлтгэж, олон нийтэд санхүүгийн мэдлэг түгээжээ.

• Багш, сурагчид, эцэг эхчүүд үргүй зардлаас татгалзаж, өрхийн төсвөө хөтлөн, хуримтлал үүсгэсэн байна.

• “Дэлхийн мөнгөний долоо хоног” аяны хүрээнд бүх анги оролцож, идэвх санаачилга гаргажээ.

Булган аймгийн нэгдүгээр сургуулийн 10а анги “Шинийг санаачлагч шилдэг анги”-аар шалгарсан бол тус сургуулийн багш Ш.Сарантуяа “Бүтээлч шилдэг багш”-аар тодорчээ. Тэрбээр “Зорилго тавиад хамтдаа эхэлж, хамтдаа ялалтад хүрсэндээ үнэхээр их баяртай байна” хэмээн сэтгэгдлээ хуваалцсан байна.

Сурагчид анги хамт олноороо хуримтлалын дадал эзэмшиж, санхүүгийн хандлагаа өөрчилсөн нь “Level up” хөтөлбөр бодит үр дүнтэй хэрэгжсэнийг илтгэж байна.

Эх сурвалж: УИХ-ын Хэвлэл мэдээллийн алба