Говийн унаган мал сарлагийг алдаршуулсан “Сайханы сарлаг” уламжлалт баярыг 2025 оны тавдугаар сарын 24-ний өдөр Өмнөговь аймгийн Ханхонгор сумын Мандах багийн нутаг, Оюутын хөндийн Үнэгэд хэмээх газарт зохион байгуулах гэж байна. Энэхүү баяр нь говь нутгийн онцлог мал болох сарлагийн генефондыг хамгаалах, үржүүлгийн уламжлалыг хадгалах, тоо толгойг нэмэгдүүлэх, сарлаг үржүүлэгчдийг дэмжих, олон нийтэд сурталчлах, аялал жуулчлалтай уялдуулан хөгжүүлэх зорилготой бөгөөд энэ жил 11 дэх удаагаа болно.

Өмнөговь аймгийн хэмжээнд 900 гаруй сарлаг тоолуулсан нь сүүлийн жилүүдэд тоо толгой өсөж байгааг харуулж байна. Өнгөрсөн жилийн баярт 5 сумаас ирсэн 24 өрхийн 400 гаруй сарлаг оролцсон бол нийт 2000 гаруй дотоодын иргэн, 200 гаруй гадаадын жуулчин хүрэлцэн ирж сонирхон үзжээ.

Энэ жилийн баярын хүрээнд дараах онцлог үйл ажиллагааг зохион байгуулахаар төлөвлөсөн байна. Үүнд:

• Сарлаг бүрд урамшуулал олгох

• Сүү, цагаан идээ болон гар урлалын бүтээгдэхүүний үзэсгэлэн худалдаа

• Сарлагийн зан үйлтэй холбоотой буухиа тэмцээн

• Шилдэг бух, үнээ шалгаруулах

• Хамгийн сайхан тоноглосон, гаршуулсан сарлаг шалгаруулах

• Сарлагийн уралдаан, булгиулах тэмцээн

• Хөгжөөнт тоглоом, уралдаан тэмцээнийг сум тус бүрээр зохион байгуулах

Энэхүү арга хэмжээ нь зөвхөн малчин өрхүүдийн хөдөлмөрийг үнэлж, мал сүргийн үнэ цэнийг өсгөхөөс гадна нутгийн аялал жуулчлалын салбарт шинэ өнгө, сонирхол татах хөтөлбөр нэмэхээр хүлээгдэж байна.

Эх сурвалж: Өмнөговь аймгийн ЗДТГ