Монгол, Оросын эрдэмтдийн хамтарсан “Өчигдрөөр ирээдүйг харахуй” сэдэвт сэргээн засварлагчдын анхдугаар бага хурал боллоо. Хурлын үеэр хоёр орны мэргэжилтнүүд соёлын биет өвийн хадгалалт, сэргээн засварлалтын өнөөгийн нөхцөл байдал, хэрэглэж буй технологи, тоног төхөөрөмжийн хэрэглээ, арга зүй, лабораторийн онцлог зэрэг асуудлаар хэлэлцүүлэг өрнүүлж, цаашдын хамтын ажиллагааны чиглэлийг тодорхойлов.

Соёлын өвийн үндэсний төвийн захирал Г.Энхбат хурлын үеэр хэлэхдээ “ОХУ бол түүх, археологийн олдворыг сэргээн засварлах арвин туршлагатай улс. Бид музейн үзмэр, уран барилга, хээрийн дурсгалт хөшөөг сэргээн засварлах чиглэлээр хамтран ажиллах боломжтой. Мөн хоёр орны байгууллагууд хамтран ажиллах санамж бичигт гарын үсэг зурсан” хэмээн онцоллоо. Хурлын хүрээнд Оросын мэргэжилтнүүд орон нутгаар явж, сэргээн засварлалтын ажлуудтай танилцахаар төлөвлөсөн байна.

ОХУ-ын Соёлын яамны Төрийн хамгаалалттай түүх, соёлын дурсгал хамгаалах газрын орлогч дарга Проценко Денис Сергеевич “Энэхүү хурал нь хоёр орны найрамдлыг бэхжүүлэх, хамтын ажиллагааг өргөжүүлэх чухал алхам боллоо. Монголын сэргээн засварлалтын төвийн үйл ажиллагаа өндөр түвшинд хүрсэн нь анхаарал татаж байна. Цаашид хоёр орны мэргэжилтнүүд харилцан сургалт, туршлага солилцох чиглэлээр хамтран ажиллана” хэмээн ярилаа.

Хуралд Соёлын яам, Соёлын өвийн үндэсний төв, ОХУ-ын Соёлын яамны төлөөлөгчид болон салбарын судлаач, мэргэжилтнүүд өргөн бүрэлдэхүүнтэйгээр оролцлоо.

Эх сурвалж: Соёлын өвийн үндэсний төв