"Боловсролын сэргэлт – боловсон хүчний сэргэлт – Булганы сэргэлт" хөтөлбөрийн хүрээнд Булган аймгийн сурагчид БНСУ-ын Хусо их сургуульд тэтгэлэгтэй суралцах боломжтой боллоо. Энэ хүрээнд аймгийн Засаг дарга Д.Пүрэв-Очир тэргүүтэй төлөөлөгчид тус сургуулийн гадаад харилцаа, хамтын ажиллагаа хариуцсан орлогч захирал Ким Жон Жүгийн ахалсан төлөөлөгчдийг хүлээн авч уулзав.

Уулзалтын үеэр хоёр тал дараах асуудлаар нэгдсэн ойлголтод хүрч, хамтын ажиллагаагаа эхлүүлэв. Үүнд:

• Булган аймгийн сурагчдыг Хусо их сургуулийн бакалавр, магистрын хөтөлбөрт тэтгэлэгтэй элсүүлэх

• Суралцагчдыг төгссөний дараа Асан хотод байрлах Самсунг, Хюндай зэрэг компанид дадлагажуулах

• Оюутны ар гэрийн нэг хүнийг нэг жилийн хугацаанд ажиллах боломжтой нөхцөлөөр хангах

• Ухаалаг технологи, код бичих, робот зохион бүтээх, солонгос хэл, таеквондо чиглэлийн богино хугацааны сургалт, танхим болон цахимаар зохион байгуулах

• Хүүхдэд ээлтэй аялал жуулчлалын хөтөлбөр хэрэгжүүлэх

• Булган аймгийн багш, эмч нарыг урт болон богино хугацааны сургалт, туршлага судлах хөтөлбөрт хамруулах

• Хөдөө аж ахуйн их сургуулийн харьяа Политехникийн коллежид код бичих, робот бүтээх чиглэлийн анги нээн, сургалтын хөтөлбөрийг орон нутгийн онцлогт тохируулан хэрэгжүүлж, төгсөгчдийг Хусо их сургуульд үргэлжлүүлэн суралцуулах

Ийнхүү боловсрол, технологийн хамтын ажиллагааг шинэ түвшинд гаргах, аймгийн хүүхэд, залуусыг гадаадын нэр хүндтэй их сургуульд суралцуулах боломж нээгдэж байна.

Эх сурвалж: Булган аймгийн ЗДТГ