Монгол Улсын Ерөнхийлөгчийн ивээл дор зохион байгуулагдаж буй 37 дахь удаагийн “Номын баяр” жанжин Д.Сүхбаатарын талбайд нээлтээ хийлээ. Уг арга хэмжээний нээлтэд Ерөнхийлөгчийн Тамгын газрын дарга Г.Занданшатар оролцож, уншигч, зохиолч, хэвлэн нийтлэгчид, эх хэл, бичиг соёлоо түгээн дэлгэрүүлэгчдэд баярын мэнд дэвшүүллээ.
Тэрбээр энэхүү баяр нь:
-
Ном унших соёл, дадлыг төлөвшүүлэх,
-
Зохиолч, хэвлэн нийтлэгчид шинэ бүтээлээ олон нийтэд хүргэх боломж бүрдүүлэх,
-
Уншигчдыг урамшуулах, соёлын үнэт орчныг хөгжүүлэх ач холбогдолтойг онцоллоо.
Энэ жилийн номын баярын шилдгүүд:
-
Шилдэг ном: Р.Оюунжаргалын The story of a little nomad
-
Шилдэг хэвлэлийн газар: “Нэпко”
-
Шилдэг уншигч – Насанд хүрэгч: Архангай аймгийн “Ном бол цөм” клуб
-
Шилдэг номын сан: “Мөнххада” номын сангийн төсөл (ЕБС-ийн номын сан тохижуулсан)
Шилдэг уншигч хүүхдүүд:
-
Ахлах анги: Булган аймгийн 1 дүгээр сургуулийн 10а анги
-
Дунд анги: Дархан-Уул аймгийн “Оюуны ирээдүй” сургуулийн 4-9 анги
-
Бага анги: “Сант” сургуулийн 4а ангийн сурагч Б.Есүй
-
Шилдэг уншигч анги: Дархан-Уул аймгийн “Цайхун” сургуулийн 7а анги (Багш: Г.Хулан)
“Мэргэн ном”-ын шагнал:
-
Зохиолч Ц.Дөлгөөн (Authentic Mongolia)
-
“Аргун” хэвлэлийн газар
-
Соёлын гавьяат зүтгэлтэн Г.Аким
Мөн нэр бүхий 13 хүүхдийг “Тэргүүний уншигч Д.Нацагдорж” тэмдгээр шагнажээ.
Онцлох агуулга:
Ерөнхийлөгчийн Тамгын газар өмнөх баярт “Дэлгэрэнгүй тайлбартай Монголын нууц товчоо” болон түүний англи орчуулгыг, энэ удаад “Монгол-Казах, Казах-Монгол толь бичиг”-ийг өргөн барьж, хэвлэлд дэмжлэг үзүүлжээ.
Жил бүр дунджаар 300,000 гаруй хүн, 200 гаруй хэвлэн нийтлэгч, 300 орчим зохиолч, орчуулагч, зураач, редактор, эрдэмтэн судлаач оролцдог “Номын баяр”-т энэ жил ОХУ, БНХАУ, БНСУ-аас зохиолч, хэвлэн нийтлэгчид хүрэлцэн ирсэн байна.
Монгол Улсад жилд дунджаар 4,000 орчим шинэ болон дахин хэвлэлтэй бүтээл хэвлэгдэж, сүүлийн таван жилд 18,000 гаруй ном олон улсын стандарт дугаарт бүртгүүлсэн байна. Эдгээрийн 22 хувь нь уран зохиол, 10 хувь нь боловсрол, 13 хувь нь намтар, түүх, үлдсэн нь бусад шинжлэх ухаан, соёл, нийгмийн чиглэлийн бүтээлүүд байна.
Номын баярыг “Номын соёлт ертөнц” ТББ санаачлан, Ерөнхийлөгчийн Тамгын газар болон холбогдох яам, байгууллагууд хамтран зохион байгуулж байна. Баяр ням гарагт өндөрлөнө.
Эх сурвалж: Ерөнхийлөгчийн Тамгын газар, “Номын соёлт ертөнц” ТББ.
