Биеийн тамир, спортын улсын хорооны дарга Э.Билэгт өнөөдөр Япон улсын Шизүока мужийн Яйзү хотын дарга Накано Хиромичи болон түүний төлөөлөгчдийг хүлээн авч уулзан, биеийн тамир, спортын салбарт хамтран хэрэгжүүлэх ажлын талаар харилцан санал солилцож, тодорхой тохиролцоонд хүрлээ.

Уулзалтад Монголын талаас тус хорооны ТЗУГ-ын дарга О.Баттулга, БТГ-ын дарга О.Гэрэл, БТБХХ-ийн дарга О.Баасан, ГХМТХ-ийн дарга Н.Оюунбат, ахлах мэргэжилтэн Ө.Номуун нар оролцсон бол Япон талаас Яйзү хотын ИТХ-ын дарга Мүрамацү Юкимаса, Захиргааны газрын дарга Икэгаяа Исамү, Гадаад харилцааны хэлтсийн дарга Окамото Макото нарын албаны хүмүүс байлцлаа.

Талууд хоёр орны хамтын ажиллагааны 10 жилийн ой тохиож байгааг онцолж, энэ хугацаанд төрийн албан хаагчдын мэргэжлийг дээшлүүлэх, бодит үр дүн бүхий хамтын ажиллагаа өрнөсөн гэдгийг тэмдэглэлээ. Цаашид орон нутагт ажиллаж буй биеийн тамирын арга зүйч нарыг Яйзү хотод богино хугацааны сургалтад хамруулах талаар санал нэгдсэн байна.

Дарга Э.Билэгт Япон улсад болох Азийн зуны спортын наадам-тай холбогдуулан зарим спортын төрөл дээр хамтарсан бэлтгэл сургуулилт хийх санал дэвшүүлжээ. Үүний хүрээнд хоёр тал чөлөөт бөх, 3х3 сагсан бөмбөг, пара хөнгөн атлетик, пара таеквондо зэрэг төрлөөр үндэсний шигшээ багийн тамирчдын олимп, паралимпын өмнөх бэлтгэлийг амжилттай зохион байгуулсныг дурдаж, үр дүнтэй хамтын ажиллагаа болсон гэдэгт санал нэгджээ.

Мөн өнгөрсөн 2018, 2019 онуудад Монголын биеийн тамир, спортын салбарын ажилтнуудыг оролцуулсан “Япон дахь нийтийн биеийн тамирын хөгжлийн бодлого, арга хэмжээ, тэмцээний зохион байгуулалт” сэдэвт сургалтыг 40 гаруй хүний бүрэлдэхүүнтэй зохион байгуулж байсныг дурдсан байна.

Эх сурвалж: Биеийн тамир, спортын улсын хороо