Азийн физикийн XXV олимпиад Саудын Арабын хаант улсын Дахран хотод энэ сарын 4-12-нд болж, Азийн гучин орны 240 гаруй сурагч, 100 гаруй багш, дасгалжуулагч оролцсон өрсөлдөөнтэй уралдаан болж өндөрлөж байна. Монгол Улсаас оролцсон 8 сурагч түүхэн амжилт гаргаж, анх удаа мөнгөн медаль хүртэн, 6 хүрэл медаль, 1 шагналт байр эзэллээ.

Ийнхүү Монголын баг Азийн физикийн олимпиадад оролцсон түүхэндээ анхны мөнгөн медалиа авч, олон улсын олимпиадын амжилтын түүхэнд шинэ хуудас нээж чадлаа.

Монголын багийг МУИС-ийн багш, доктор дэд профессор Г.Мөнхбаяр, ШУТИС-ийн багш, доктор дэд профессор Г.Зоригт нар ахалж, дасгалжуулагчаар УФО-ын хорооны дарга М.Ганбат, МУИС-ийн багш М.Отгонбаатар нар ажилласан байна.

Шагнал гардуулах ёслол маргааш болох бөгөөд өнгөрсөн жил Монгол Улс хоёр хүрэл медаль, хоёр шагналт байр эзэлж байсан амжилтаа энэ жил давтан, түүхэн дээд амжилт тогтоолоо.

Ирэх жилийн Азийн физикийн олимпиад “АФО2026” нь БНСУ-ын Бусан хотод зохион байгуулагдах юм.

Эх сурвалж: БШУЯ