Боловсролын үнэлгээний төвөөс Монгол хэл бичгийн шалгалтын үр дүнг албан ёсоор танилцууллаа. 2025 оны энэ шалгалтад нийт 83374 шалгуулагч оролцсон бөгөөд үүнээс 70410 нь шалгалтад тэнцэж, нийт шалгуулагчдын 84.5 хувь нь шаардлагатай босго оноог давсан байна. Харин 12964 шалгуулагч буюу нийт оролцогчдын 15.5 хувь нь шалгалтад тэнцээгүй гэж мэдээлэв.

Энэ жилийн шалгалтын онцлог нь арванхоёрдугаар ангийн сурагчдаас гадна 10, 11 дүгээр ангийн сурагчид ч уг шалгалтыг өгөх боломжтой болсон явдал юм. Мөн хамгийн өндөр буюу 800 оноо авсан шалгуулагчийн тоо өмнөх жилүүдтэй харьцуулахад нэмэгдэж, 121-д хүрсэн байна.

Шалгалтад тэнцээгүй шалгуулагчид энэ оны арванхоёрдугаар сард дахин шалгалт өгөх боломжтой бөгөөд үүнтэй холбоотой дэлгэрэнгүй мэдээллийг Боловсролын үнэлгээний төвөөс авах боломжтой юм.

Шалгалтын дүн оноондоо санал нийлэхгүй байгаа шалгуулагчид тавдугаар сарын 9-13-ны өдрүүдэд Боловсролын үнэлгээний төвд хандан өргөдөл гаргаж, өөрийн шалгалтын материалтай танилцах боломжтой. Өргөдлийг ШУТИС-ийн Т байрны хоёр давхрын 207 тоотод ажлын цагаар хүлээн авч байгаа бөгөөд шалгалтын дүн гарсантай холбоотойгоор бямба, ням гарагт ч 09:00-18:00 цагийн хооронд ажиллаж байна.

Эх сурвалж: Боловсролын үнэлгээний төв