“Тэрбум мод” үндэсний хөдөлгөөн, “Ногоон Дархан 2032” хөтөлбөр, хаврын мод тарилтын хүрээнд Дархан-Уул аймгийн Байгаль орчин, аялал жуулчлалын газар, Боловсролын газар хамтран ерөнхий боловсролын сургуулиудын есдүгээр ангийн сурагчдын төлөөлөл оролцсон онол, практикийн хосолсон сургалт зохион байгууллаа. “Ногоон ирээдүйн төлөө амьд өв үлдээцгээе” нэртэй энэхүү сургалтаар сурагчид модны ач холбогдол, түүний хүний эрүүл мэнд, байгаль орчинд үзүүлэх үр нөлөөний талаар гүнзгий мэдлэг авч, практик дадлага хийжээ.

Сургалтын хүрээнд дараах сэдвүүдийг хамарсан онолын мэдлэгийг багш, мэргэжилтнүүдээс олголоо:

• Модны биологийн онцлог, хүний амьдралд үзүүлэх ач холбогдол

• Цаг уур, хөрс хамгаалалт, цөлжилт, уур амьсгалын өөрчлөлтөд ой модны үзүүлэх нөлөө

• Монгол орны ойн төрөл, модлог ургамлууд, хээрийн болон өндөр уулын бүсийн модны тархац

• Тарьсан модоо хэрхэн арчилж хамгаалах арга барил

Онолын хэсгийг ХААИС-ийн багш, ой зүйч С.Таванжин, “Дархан төмөрлөгийн үйлдвэр” ХХК-ийн байгаль орчны мэргэжилтэн, ой зүйч Э.Мөнхжаргал нар удирдан явуулсан бөгөөд сургалтад хамрагдсан 120 сурагчид мэдлэгээ бататган “Боловсрол төгөл”-д мод тарьсан юм.

Сурагчид байгаль дэлхийгээ хайрлан хамгаалахад нэг мод тарих нь эхлэл гэдгийг онцолж, ойжуулалт, нөхөн сэргээлтийн ажилд идэвхтэй оролцохоо илэрхийлсэн байна.

Эх сурвалж: Дархан-Уул аймгийн БОАЖГ