Японы мэргэжлийн сүмо бөхийн холбоо хоёрхон сарын өмнө бөхчүүдийн дунд үйлдэгдэж буй бие махбодийн хүчирхийллийг үгүй болгох тухай асуудлыг авч хэлэлцсэн билээ. Өнгөрсөн жил Харүмафүжи Д.Бямбадорж Таканойва А.Баасандоржийн биед халдаж хүнд гэмтэл учруулсан хэрэг сүмо бөхийн ертөнцөд шуугиан дэгдээж байв. Гэтэл өнгөрсөн жилийн дуулианы хохирогч болж, Харүмафүжи Д.Бямбадоржоос их хэмжээний нөхөн төлбөр шаардаж байсан А.Баасандорж өчигдөр өөрийн дэвжээний 24 настай туслах бөхөө “Хий гэсэн юмыг мартчихаад дандаа тайлбар тавьдаг” хэмээн энэ сарын 4-ний өдрийн 23 цагийн үед 4-5 удаа цохиж, зодсон хэрэг гарсан тухай сүмо бөхийн холбооноос мэдэгджээ.

Хохирогч залуу бөх нь хүнд гэмтээгүй ч нүүр нь хавдсан байсан гэнэ. Таканойва А.Баасандорж туслахаа цохиж, зодсоноо хүлээж, уучлал гуйжээ. Холбооноос Таканоиваг тойргийн барилдаанаас чөлөөлж, дэвжээнд нь гадагш гарахгүй “гэрийн хорио” гэж хэлж болохоор шийтгэл оноосон байна. Одоогоор тус холбоо үүнээс өөр тодорхой мэдэгдэл хийгээгүй байгаа бөгөөд хохирогчийн мэдүүлгийг сонссоны дараа ямар шийтгэл оноохоо шийднэ, мөн маш хатуу шийтгэл онооно гэдгээ мэдэгджээ.