Боловсролын салбарт тэгш хамруулах боловсролын чиглэлээр өргөн хэрэглэгддэг нэр томьёог гадаад хэлнээс зөв орчуулан, салбарын хэмжээнд нэгдсэн ойлголттой болох зорилгоор санал авах уулзалтыг өчигдөр зохион байгууллаа. Уулзалтын хүрээнд нэр томьёоны утга агуулга, орчуулгын оновчтой байдлыг хэлэлцэж, цаашид салбарын баримт бичиг, сургалтын агуулгад нэгдсэн байдлаар хэрэглэхэд чиглэсэн санал солилцжээ.

Энэхүү уулзалт нь “Ерөнхий боловсролын сургуулийн багш нарт зориулсан тэгш хамруулах боловсролын цахим платформ бий болгох” төслийн хүрээнд зохион байгуулагдсан бөгөөд уг төслийг Боловсролын ерөнхий газар болон “Адина–тэгш боломж” төрийн бус байгууллага хамтран хоёр жилийн хугацаанд хэрэгжүүлж байна.

Төслийн хүрээнд дараах есөн чиглэлээр багш нарт зориулсан модулиуд боловсруулагдсан. Үүнд:

• Аутизмын хүрээний эмгэг

• Тулгуур хөдөлгөөний бэрхшээл

• Хэл ярианы бэрхшээл

• Анхаарлын дутмагшил, хэт хөдөлгөөнтөх эмгэг

• Оюун ухааны бэрхшээл

• Харааны бэрхшээл

• Сонсголын бэрхшээл

• Суралцахуйн бэрхшээл

• Дауны хам шинж

Эдгээр модуль нь хөгжлийн бэрхшээлтэй хүүхдүүдтэй ажиллах арга зүйн чиглэлээр багш, нийгмийн ажилтны мэдлэг, ур чадварыг нэмэгдүүлэх зорилготой юм.

Уулзалтад Боловсролын ерөнхий газар, Хөгжлийн бэрхшээлтэй хүний хөгжлийн ерөнхий газар болон бусад төрийн болон төрийн бус байгууллагын төлөөлөл оролцсон бөгөөд төсөл нь Люксембургийн Их Вант Улсын Гадаад хэргийн яам, ПАДЕМ олон улсын байгууллагын санхүүжилтээр хэрэгжиж байна.

Эх сурвалж: Боловсролын ерөнхий газар