Нийслэлийн аварга шалгаруулах “Микро Лион Робот-2025” тэмцээн тавдугаар сарын 3-4-нд амжилттай болж өндөрлөлөө. Техник технологийн боловсролыг дэмжих, хүүхэд багачуудын чөлөөт цагийг үр бүтээлтэй өнгөрүүлэх, шинжлэх ухаанч сэтгэлгээг төлөвшүүлэх зорилготой тус тэмцээн энэ жил дрон төрөл нэмж, илүү өргөн хүрээтэй, сонирхолтой болж өргөжжээ.

Тэмцээнд нийслэл болон орон нутгийн 37 сургуулийн 160 багийн 350 гаруй сурагч оролцож, зохион бүтээсэн роботуудаа олон төрлөөр өрсөлдүүлсэн байна. Тухайлбал, хөл бөмбөг тоглодог робот, сумо, лего, зураас дагагч, шоо цуглуулагч, дрон зэрэг найман төрлөөр нас насны ангиллаар авхаалж самбаагаа сорьжээ.

Тэмцээний онцлог нь Монгол инженер, залуучуудын бүтээсэн “Лион робот” сургалтын төхөөрөмжийг ашигладагт оршино. Энэхүү төхөөрөмж нь электроник, программчлалын анхан шатнаас ахисан түвшинд суралцах боломжийг олгож, хүүхдүүдийг дотоодын болон олон улсын роботын тэмцээнд бэлтгэх үр өгөөжтэй аж.

Тэмцээнийг Нийслэлийн боловсролын газар, Баянзүрх дүүргийн ЗДТГ, Зохион бүтээгчдийн академи, “Лион Робо” компани хамтран зохион байгуулжээ.

Эх сурвалж: Нийслэлийн боловсролын газар