Монгол Улсын Ерөнхийлөгчийн ивээл дор болох “Дэлхийн Монголчуудын анхдугаар наадам” 2025 оны зургаадугаар сарын 28-нд Бельгийн Хаант Улсын нийслэл Брюссель хотод зохион байгуулагдана.
Энэхүү наадмыг Монгол Улсын Ерөнхийлөгчийн Тамгын газар, Үндэсний их баяр наадмыг зохион байгуулах хороо, Гадаад харилцааны яам, мөн “Хилийн чанад дахь Монголчуудын зөвлөл” НҮТББ-тай хамтран гадаад дахь Монгол иргэдийн үүсгэл санаачилгаар зохион байгуулж байгаа юм. Түүнчлэн Монгол Улсаас хилийн чанадад суугаа Элчин сайдын яамд болон иргэдийн байгууллагууд идэвхтэй оролцож байна.
Наадмын үеэр дараах арга хэмжээнүүд зохион байгуулагдана:
-
Хүчит бөхийн барилдаан
-
Сур, шагайн харваа, нумт шагайн тэмцээн
-
Монгол хоол, бараа бүтээгдэхүүний үзэсгэлэн худалдаа
-
Урлагийн тоглолт, соёлын арга хэмжээнүүд
Наадмын зорилго нь гаднын улс орнуудад ажиллаж, амьдарч буй Монголчуудыг нэгтгэх, үндэсний өв соёлоо түгээн дэлгэрүүлэх, харилцан холбоог бэхжүүлэх явдал юм.
Наадмын зохион байгуулалтын талаар ГХЯ-ны Төрийн нарийн бичгийн дарга, ажлын хэсгийн ахлагч Л.Мөнхтүшиг, “Хилийн чанад дахь Монголчуудын зөвлөл” НҮТББ-ын дэд тэргүүн Г.Ганзориг, ерөнхий нарийн бичгийн дарга Б.Мөнхдэлгэр нар хэвлэлийн бага хурал хийж, тамирчдын бүртгэлийг Европ дахь Элчин сайдын яамд болон мэргэжлийн холбоодууд хариуцан зохион байгуулна гэдгийг мэдэгдлээ.
Эх сурвалж: ГХЯ
