Монгол бичиг, соёлын үнэ цэнийг түгээн дэлгэрүүлэх зорилготой Үндэсний бичиг үсгийн баярыг энэ жил Ховд аймагт өргөн дэлгэр зохион байгууллаа. Монгол Улсын Ерөнхийлөгчийн зарлиг, Засгийн газрын тогтоолын дагуу энэхүү баярыг жил бүрийн тавдугаар сарын эхний ням гарагт тэмдэглэх уламжлалтай бөгөөд энэ жилийн уриа нь "Үндэсний бичиг үсэг – Монгол соёлын үнэт өв" байв.

Баярын үйл ажиллагаанд Ховд аймгийн Боловсролын газар, Жаргалант сумын ерөнхий боловсролын сургуулиуд, Нийтийн номын сан, Музей, Хөгжимт драмын театр зэрэг байгууллагуудын төлөөлөл оролцож, бичиг үсгийн ач холбогдлыг олон нийтэд сурталчилсан юм.

Баярын хүрээнд дараах үйл ажиллагаанууд зохион байгуулагдлаа:

• Үндэсний бичгээр унших уралдаан

• Компьютер болон гар утас ашиглан үндэсний бичгээр бичих тэмцээн

• Бичиг үсгийн түүх, хөгжил, ач холбогдлыг танилцуулсан лекц, үзүүлэн

• Иргэд, хүүхэд, өсвөр үеийнхэнд чиглэсэн соён гэгээрүүлэх хөтөлбөр

Онцлог нь энэ жил номын баяраас тусгаарлан, үндэсний бичиг үсгийн баярыг бие даан зохион байгуулсан явдал бөгөөд оролцогчдын тоо, олон нийтэд хүрсэн үр нөлөө өмнөх жилүүдээс илүү өргөн хүрээтэй, бүтээлч болсон талаар аймгийн Соёл, урлаг, аялал жуулчлал, залуучуудын газраас мэдээллээ.

Эх сурвалж: Ховд аймгийн Соёл, урлаг, аялал жуулчлал, залуучуудын газар