Хүүхдийн ордонд боловсролын фестиваль зохион байгуулагдаж байна. Энэ хүрээнд БНСУ-тай хамтран хэрэгжүүлж буй хүүхэд төвтэй боловсролын “3Пи” хөтөлбөрийн хэрэгжилт, үр дүнг танилцуулж, сайн туршлагыг түгээх үйл ажиллагаа өрнөж байна.
“3Пи” хөтөлбөр нь мэдлэг, чадвар, хандлагыг цогцоор нь хүүхдэд олгох зорилготой бөгөөд хичээлийн сургалтаас гадна сурагчийн сонирхол, хэрэгцээнд тулгуурласан орчныг бүрдүүлэхэд чиглэжээ. Боловсролын ерөнхий газрын мэдээлснээр тус хөтөлбөрийг 2022 оноос хэрэгжүүлж эхэлсэн бөгөөд энэ жил 16 сургууль хэрэгжүүлсэн туршлагаа бусдад түгээж байна.
Хөтөлбөрийн хүрээнд сурагчид өөрсдөө төсөл санаачилж, түүнийгээ хэрэгжүүлэх орчинг бүрдүүлдэг. Жишээлбэл, зарим сурагчид чөлөөтэй ярилцаж, уншсан номынхоо талаар хэлэлцэх булан, орчныг бий болгох санал гаргаж, сургууль, багш, эцэг эхийн хамтын оролцоотойгоор хэрэгжүүлжээ.
Төслийг анх Баянгол дүүргийн сургуулиуд тэргүүлэн хэрэгжүүлсэн бөгөөд 47, 93, 51 дүгээр сургуулиуд илүү манлайлан оролцож байгаа аж. Хөтөлбөрийн онцлог нь зөвхөн манлайлагч цөөн сурагчийг хамруулах бус, бүх анги, хамт олныг идэвхтэй оролцуулж, нийт сурагчдын оролцоонд суурилсан арга зүйг бий болгоход чиглэж байна.
Мөн багш нар зөвхөн хичээл заахаас гадна сурагчийн санаачилгыг дэмжих, чиглүүлэх, сургуулийн үйл ажиллагааг уялдуулах чадамжтай байх хэрэгтэйг онцолж байна. Ингэснээр нэг удаагийн арга хэмжээ бус, тогтмол үр дүнтэй оролцооны боловсролын орчин бүрдэх боломжтой гэж үзэж байна.
Боловсролын фестиваль гурван өдрийн турш үргэлжлэх бөгөөд сурагч, багш, эцэг эхчүүдэд нээлттэй байна.
Эх сурвалж: Боловсролын ерөнхий газар
