Сүүлийн жилүүдэд биеийн эерэг хандлагыг уриалсан бодипозитив хөдөлгөөн загварын ертөнцөд томоохон байр суурь эзэлж байсан бол 2024 оноос эхлэн энэ хандлага эрс өөрчлөгдөж байна. Плюс-сайз моделийн зах зээлд нэрээ дуурсгасан Скай Стендлигийн карьерын уналт үүний тод жишээ юм. Тэрээр “хоёрхон жилийн өмнө миний нэртэй холбогдсон рекламын ажлууд тасрахгүй байсан бол одоо жилийн турш цөөхөн зураг авалтад оролцсон” хэмээн ярьжээ. Үүнтэй зэрэгцэн олон загварын компаниуд Скайтэй хамтын ажиллагаагаа зогсоосон байна.

Энэ хандлагын эргэн өөрчлөлтөд нэгэн хүчтэй нөлөө үзүүлэгч зүйл бий болсон нь тураах тарилга Ozempic юм. Эмчийн жороор олгодог, анх чихрийн шижингийн эмчилгээний зориулалттай байсан энэ эм нь биеийн жинг хурдан бууруулах нөлөөгөөрөө олны анхаарлыг татаж, моодны салбарт шинэ эргэлт авчирчээ. Үүнийг хэрэглэсэн алдартнуудын тоонд Илон Маск, Ким Кардашьян, Опра Уинфри зэрэг нэрс багтсан бөгөөд олон нийтийн сүлжээнд “жин хассан туршлага”-аар хуваалцаж, тарган биеийг хүлээн зөвшөөрөх хандлагыг сүүдэрт үлдээв.

Загварын салбар дахь энэ өөрчлөлт нь зөвхөн ганц, хоёр моделийн карьер төдийгүй бүхэл бүтэн салбарыг хамарсан. 2023 онд Лондоны загварын долоо хоногт 80 орчим плюс-сайз модель оролцож байсан бол 2024 онд энэ тоо 26 болж буурсан бөгөөд тэдгээрийн 17 нь нэг л дизайнерын шоунд оролцжээ. Нью-Йорк, Миланы шоунууд дээр ч мөн ижил хандлага ажиглагдаж, бодит бие галбирыг төлөөлдөг моделуудын тоо огцом буурсан байна.

Олон нийтийн дарамт нэмэгдэж, “хэтэрхий бүдүүн” гэх гомдлууд өдөр бүр моделиуд руу чиглэж байгаа нь Snag зэрэг брэндүүдийн мэдээллээр нотлогдож байна. Тус брэндийн тэргүүн хэлэхдээ өдөрт дунджаар 100 гаруй гомдол хүлээн авдаг гэжээ.

Ozempic-ийн нөлөө зөвхөн гоо сайхны салбарт зогсохгүй, хүнсний салбарт ч мөн нөлөөлж байна. Хоолны дуршлыг бууруулдаг энэ эмийн тархалт нэмэгдэхийн хэрээр томоохон компаниуд шинэ хэрэглэгчиддээ тохируулсан бүтээгдэхүүн гаргаж эхэлсэн. Жишээлбэл, Nestle компани Ozempic хэрэглэгчдэд зориулсан бага порцтой, хөнгөн хөлдөөсөн хоолны 12 цувралыг танилцуулсан байна.

Эх сурвалж: The Guardian, Vogue Business, NYTimes, BBC, officelife.media, Nestle.