Эмэгтэй хүн үргэлж үнэнийг хэлдэг. Үүнийг батлах нэг зүйл өчигдөр болов. Боловсрол, соёл, шинжлэх ухаан, спортын сайд Ц.Цогзолмаа өчигдөр ажлаа өглөө. Түүний Засгийн газраа огцруулахаар гарын үсэг зурсан нь “Засгийн газар кабинетийн зарчмаар ажиллана” гэсэн Засгийн газрын тухай хуулийн зүйл заалтыг зөрчсөн хэмээн үзэж танхимын тэргүүн нь огцруулах саналаа Ерөнхийлөгчид хүргүүлэв. Ц.Цогзолмаа хариуд нь “Би огцруулах санал гаргаснаас гадна УИХ-аар асуудлыг хэлэлцэх үед огцруулах нь зүйтэй гэж кнопоо дарсан. Би энэ Засгийн газарт ажиллах ёс суртахууны эрхгүй гэж үзэж байна. Ерөнхий сайдын шийдвэрийг хүлээж авна” гэв.  

Гэтэл ЖДҮ-ийн зээлээр эхнэрийнхээ ББСБ-ыг ивээн тэтгэсэн (Эхнэр Б.Мөнхцэцэг нь компанийн 25 хувийг эзэмшдэг) Зам тээвэр хөгжлийн сайд Я.Содбаатар “Би Ерөнхий сайдын шударга ёсны тэмцлийг дэмжиж сайн дураараа ажлаа хүлээлгэн өгч байна. Албан үүрэгтэй нь хамааралгүй асуудлаар ёс зүйн хариуцлага хүлээсэн анхны хүн би боллоо” гэж тэнэглэв. Энэ хоёр хүний “ёс суртахуунд” ихээ холын зөрүү байна аа даа. Нэг нь буруугүй мөртлөө огцорч байхад нөгөө нь “би буруугүй шүү” гэж хэлсээр л байна. Энгийн нүдээр харахад л ЖДҮ-ийн мөнгийг ББСБ-даа угаасан хүн гэм буруутай юу, эсвэл “ЖДҮ-жсэн Засгийн газарт ажиллахгүй” гэж хэлсэн нь буруутай юу?

Боловсролын сайдын гараа өргөхөд хүрсэн хоёр дах шалтгаан нь түүний гэр бүлийн байдлаас үүдэлтэй гэдгийг сайд хэлэв. “Миний нөхөр, хүүхэд надаас болоод төрийн албанд ажиллахгүй байх шалтгаан байхгүй. Энэ хоёр хүн өөрсдийн мэргэжил ажлын туршлагаар шалгараад төрийн яам, төрийн өмчид компанид ажилласан байхад миний албан тушаал түүнд нь саад болох ёсгүй” гэж хэлэв. Түүний охин БОАЖЯ-ны Аялал жуулчлалын бодлого, зохицуулалтын газрын даргаар ажилладаг юм байна. ТАЗ-өөс түүнийг “ажилласан жил нь яамны газрын даргаар ажиллахад хангалтгүй тул дүгнэлт гаргах боломжгүй” гэдэг хариу ирүүлсэн боловч БОАЖЯ-ны нөхөд үүнийг үл хайхран ажиллуулсаар байгаагаас үзвэл сайдын хэлсэнчлэн “мэргэжилдээ гаргууд” нэгэн бололтой. Харин нөхөр Ч.Саранжавын хувьд саяхан “Улаанбаатар дулааны сүлжээ” төрийн өмчит үйлдвэрийн газрын гүйцэтгэх захирлаар томилогдсон. Өмнөх захирлыг нь авлигын хэргээр АТГ-аас саатуулан шалгаж байгаа.

Ямар ч байсан Боловсролын сайд Ц.Цогзолмаа улстөрчийн хувьд тун ховор сонголтыг хийлээ. Гэр бүлийнхээ хүмүүсийг амар тайван ажлыг нь хийлгэхийн тулд сайдын албан тушаалаас татгалзаж байгаа нь Я.Содбаатар сайдын хэлсэнчлэн жинхэнээсээ “анхны тохиолдол” болов. Хэрвээ үнэхээр нөхөр, охин хоёрт нь илүү гэрэл гэгээтэй ирээдүй харагдаж байвал муу нэртэй, луу данстай сайдын албан тушаалтай зууралдаад ч яах юм. Эмэгтэй хүн үргэлж үнэнийг хэлдэг гэдгийг баталсан бас нэг жишээ. Эрчүүд минь Ц.Цогзолмаа сайдаас үлгэр авцгаа. Чадах чадахгүй улс төр хийж, өөрийгөө ч өрөөлийг ч баллаж байхын оронд зүгээр л “хажуудаа байгаа эрдэнээ” хайрлацгаая.

Нээрээ Я.Содбаатар гишүүн эхнэрийнх нь компани (ББСБ) ЖДҮХС-гаас ямар зориулалтаар хэдэн тэрбумын зээл авсан гэдгийг одоо хүртэл асуугаагүй гэсэн шүү. Б.Наранхүү шиг бай л даа. 1,2 тэрбум (ХХААХҮ-ийн сайд Б.Батзоригийн дараа орсон хоёр дахь том зээлдэгч), гишүүн ээ!     

Б.ЗАЯА