Засгийн газрын хэрэгжүүлэгч агентлаг Боловсролын ерөнхий газар, БНСУ-ын 2HM консорциумтай стратегийн хамтын ажиллагааны санамж бичиг байгууллаа. Уг консорциум нь БНСУ-д төвтэй Дэлхийн K-POP-ыг дэмжих сангийн төлөөлөлтэй хамтран байгуулагдсан бөгөөд санамж бичгийн зорилго нь хиймэл оюун ухаан болон аж үйлдвэрийн дөрөвдүгээр хувьсгалын эрин үед олон улсын хамтын ажиллагааг өргөжүүлж, дэлхийн хэмжээний шилдэг боловсон хүчнийг бэлтгэхэд чиглэж байна.

Энэ хамтын ажиллагаа нь шинэлэг, уян хатан боловсролын систем, платформ хөгжүүлэх, оюутны бүх талын хөгжилд чиглэсэн бодлогын шинэчлэл хийх, боловсролын тулгамдсан асуудлыг шийдвэрлэхэд үнэтэй хувь нэмэр оруулах юм. Талууд хамтын ажиллагаагаа дараах үндсэн чиглэлээр хэрэгжүүлэхээр тохиролцжээ. Үүнд:

• Хиймэл оюун ухаанд суурилсан боловсролын систем, платформ хөгжүүлж, түүнийг нэвтрүүлэх;

• AI-д тулгуурласан суралцах чадвар, мэргэжлийн чиг баримжааг үнэлэх хэрэгслийг боловсруулж, хэрэгжүүлэх;

• Дижитал ялгааг арилгах, суралцах үр нөлөөг нэмэгдүүлэхэд чиглэсэн мэдээллийн технологийн платформыг хөгжүүлэх;

• Монгол Улсад нийцсэн шинэ төрлийн хичээлийн хөтөлбөр, өөрөө удирдан суралцах, судалгаанд суурилсан загварыг турших;

• БНСУ-ын их сургуулиудтай хамтран кредит тооцох тогтолцоог бий болгох, хичээлийг урьдчилан судлах боломж бүрдүүлэх;

• БНСУ-ын MyPol сургуулийн Монгол дахь салбарыг нээх;

• Монгол, Солонгосын сурагчдын хосолмол солилцооны хөтөлбөр хэрэгжүүлж, дэлхийн иргэнийг хамтран бэлтгэх;

• Соёлын нэгдмэл боловсролыг дэмжих төсөл санаачлан хэрэгжүүлэх.

Энэхүү санамж бичиг нь Монгол Улсын боловсролын системд инновац нэвтрүүлэх, олон улсын туршлага, дэвшилтэт арга зүйг нутагшуулах шинэ боломжуудыг нээж буй чухал алхам юм.

Эх сурвалж: Боловсролын ерөнхий газар.