“Тэгш хүртээмжтэй, тогтвортой, цогц үйлчилгээгээр бага насны хүүхдийн хөгжлийг дэмжих нь” төслийн гэрээнд өнөөдөр гарын үсэг зурлаа. Энэхүү төслийг Японы төрийн бус байгууллагуудтай хамтран хэрэгжүүлэх буцалтгүй тусламжийн хөтөлбөрийн хүрээнд хэрэгжүүлж байгаа бөгөөд төслийн гэрээнд Японы Элчин сайд М.Игавахара болон Японы Хүүхдийг ивээх сангийн Монгол дахь хөтөлбөрийн менежер, суурин төлөөлөгч Л.Баян-Алтай нар гарын үсэг зурсан байна.

Төслийг 2024 оны 3 дугаар сарын 30-наас эхлэн нэг жилийн хугацаанд хэрэгжүүлэх бөгөөд нийт 641,940 ам.долларын санхүүжилттэй юм. Энэ төсөл нь өмнөх онд Баянзүрх, Чингэлтэй, Сонгинохайрхан дүүрэг болон Сэлэнгэ, Баянхонгор аймагт хэрэгжсэн төслийн үргэлжлэл хэлбэрээр өрнөх бөгөөд зорилтот бүлгийн хүүхдийн бэрхшээлийг эрт илрүүлж, нийгмийн оролцоог нэмэгдүүлэх, төрийн үйлчилгээний байгууллагуудын чадавх, хүртээмжийг сайжруулахад чиглэж байна.

Японы Хүүхдийг ивээх сангийн Монгол дахь хөтөлбөрийн менежер Л.Баян-Алтай хэлэхдээ:

• Зорилтот таван өрхийн эрүүл мэндийн төв, таван цэцэрлэгт налуу зам, угаалтуур, ариун цэврийн өрөөний суултуур зэрэг хүртээмжтэй дэд бүтцийн засварыг хийсэн

• Хөгжлийн дэмжлэг шаардлагатай хүүхдүүдэд зориулсан “Хүүхдийн хөгжлийг дэмжих танхим” байгуулсан

• Сошиал аян өрнүүлж, 3.3 сая хүнд хүрсэн нийтлэл, постер, видео, амжилтын түүх, ярилцлагуудыг түгээсэн хэмээн мэдээлжээ.

Цаашид төслийг шинээр зорилтот байгууллагуудаар өргөтгөж, орон нутгийн төрийн үйлчилгээний байгууллагуудын дэд бүтцийн орчныг сайжруулах ажлууд хийгдэх бөгөөд хөгжлийн бэрхшээлтэй хүүхэд бүрт тэгш боломж олгох зорилготой юм.

Энэхүү буцалтгүй тусламжийн тогтолцоо нь Японы Засгийн газраас хөгжиж буй орнуудын нийгэм, эдийн засгийг дэмжих зорилготойгоор Японы төрийн бус байгууллагуудаар дамжуулан хэрэгжүүлдэг хөтөлбөрийн нэг хэсэг юм.

Эх сурвалж: Гадаад харилцааны яам.