Өнөөдөр УИХ-ын нэгдсэн чуулганаар Засийн газрыг огцруулах эсэх асуудлыг хэлэлцэх ёстой. Үүний өмнө буюу өчигдөр Аюулгүй байдал гадаад бодлогын байнгын хороо хуралдах ёстой байсан ч хуралдсангүй. Ер нь бол энэ сарын 21-нд Засгийн газрыг огцруулах асуудлыг УИХ-д өргөн барьснаас хойш нэг ч байнгын хороо бүтэн хуралдсангүй. Парламентын үйл ажиллагаа бүхэлдээ зогссон гэсэн үг. Төрийн ордонд суугаа УИХ-ын гишүүд “Ажлын хэсгийн хуралтай” гэсэн нэрийн дор хэсэг бүлгээрээ цуглаж, саналаа багцалж байгаагаас өөр зүйл хийсэнгүй. Засгийн газрыг огцруулах асуудлыг 27 гишүүн өргөн барьсан. Харин 37 гишүүн (Д.Лүндээцанцан, Б.Батзориг нарыг оролцуулаад) огцруулах шаардлагагүй гэсэн байр суурь дээр нэгдээд байгаа.
Өчигдөр УИХ-ын даргад бас нэг шаардлага ирсэн нь ЖДҮХС-гаас зээл авсан гишүүдийг “сонирхлын зөрчилтэй” хэмээн үзэж санал хураалтад оролцуулахгүй байх, Ёс зүйн дэд хороогоор уг зээлтэй холбоотой гишүүдийг хэлэлцүүлэх явдал. Гэвч аль аль талд нь ЖДҮ-ийн зээлтэй нөхдийн нэр цохиж яваа тул дэд хороогоо ч хуралдуулж чадсангүй. Ингээд эрх баригч МАН-ын хувьд засгаа огцруулах эсэх асуудлаар хайнаа хагалах боломжгүй болоод байна. Аргаа бараад УИХ-ын даргыг 60 тэрбумыгн асуудлаар ҮХЦ рүү явуулж үзэж байх шиг байна л даа. Өчигдөр Ерөнхий сайд нь Цэцэд хандсан гэнэ. Түүнээс болоод гишүүд УИХ-ын даргаа эрэн сурвалжлахад хүрэв.
Ер нь бол ЖДҮ-ийн зээлтэй холбоотой энэ “жижигхээн” асуудал дээр Засгийн газар ч, УИХ ч шийдвэр гаргах чадамжгүй, асуудлыг хуулийн дагуу шийдүүлэх хүсэлгүй байгаа нь нэгэнт тодорхой боллоо. Харин 60 тэрбумтай, “ЖДҮ”-тэй хоёр нөхөр хэн нь хэнийгээ вэ гэдэг тэмцэл л үргэлжилж байна. Парламентын болон Засгийн газрын түвшинд энэ мэтчилэн хууль зөрчсөн аливаа үйл ажиллагааг засч залруулах, хариуцлага тооцох чадамжгүй гэдэг нь нэгэнт тодорхой болсон тул ЖДҮ-ийн зээл ч бай, өөр бусад хууль бус үйл ажиллагааг таслан зогсоох, төрийн үйл ажиллагааг цэвэр тунгалаг болгохын тулд эрх нь зөрчигдсөн хүн бүрийн тэмцэл хэрэгтэй цаг үе ирсэн бололтой. Гэхдээ энэ нь Засгийн газрыг огцруулах эсэх дээр хоёр талын аль алиныг нь зэвсэг болох бус, харин 60 тэрбумын гэх УИХ-ыг бүхэлд нь тарааж, эрх барьж байгаа МАН-ыг тэр чигт нь гудамжинд гаргах шаардлагатай юм байна. Ингэсний дараа эрх биш хуулийн байгууллагууд нь ажлаа хийж эхлэх биз.
Б.ЗАЯА
