Dorling kindersley-ийн тогтсон жишгээр зурагт өгүүлэмж бүхий зугаатай танин мэдэхүйн ном. Шинжлэх ухааны чухалд авах нээлтүүдийг эздийнх нь хамт цадигчлан тоймлосон. Физик, биологи, хими, одон орон зэргийн хөгжил дэвшлийг цаг хугацааны эрэмбээр нь таниулах онцлогтой. 

Цаг хугацаагаар эрэмбэлсэн учир ойлгоход энгийн бөгөөд хялбар. Нэн эрт үеэс аваад өнөөг хүртэл шинжлэх ухаан ямархан замнал туулсныг нэхэн хөөсөн агуулгатай. Түүнчлэн Исаак Ньютон, Альберт Эйнштейн, Мария Кюри зэрэг хүн төрөлхтний түүхэнд эргэлт гаргасан шинжлэх ухааны суут зүтгэлтнүүдийн намтрыг тусгайлан өгүүлсэн буй.

Dorling Kindersley-ийн бүтээгдэхүүн болохоор зураг чимгийн талаар өгүүлэх нь илүүц буй за. Шинжлэх ухааны нарийн төвөгтэй ойлголтыг энгүүн болоод ойлгомжтой илэрхийлсэн дээд зэргийн чанартай зураг, диаграмм, чимэгтэй. Номын гоёмсог дизайн дэглэлт нь шинжлэх ухааныг төдийлөн ойшоодоггүй хүнийг ч сэтгэлийг татмаар. 

Шинжлэх ухааныг өргөн цараатай өгүүлэх мөртөө аль ч сэдвийг гүнзгийрүүлээгүй. Шинжлэх ухааны ерөнхий ойлголт авах хүсэлтэй эсбөгөөс томьёо, тодорхойлолт хайсан оюутанд гарын дорх авлага болно. Зарим салбар ухааныг нарийвлан судлах гэсэн хүнд хангалтгүй санагдаж мэднэ.

Энэ ном шинжлэх ухаанд дурлагч уншигч хийгээд оюутан, сурагчдад хамгийн сайн гарын авлага болно. Бүхэлдээ шинжлэх ухааны хөгжил, салбар салбарын нээлтүүдийн уялдаа холбоог олж харахад нэн дөхөмтэй. Түүгээр зогсохгүй шинжлэх ухааны мэдлэгээ тэлэх чин хүсэлтэй хэн бүхнийг зөв замд хөтөлнө.

Шинжлэх ухааны хялбаршуулсан бүтээл мөнийн хувьд хэн ч аваад уншсан ойлгохоор бичигдсэн. Шинжлэх ухаантай танилцаж буй залуу уншигчдад хүртээмжтэй мөртөө хашир догь уншигчдад ч шинэ өнцөг гаргаж өгнө. Байгалийн шинжлэх ухаанаас гадна түүх, намтар сонирхдог уншигчдад сонирхолтой мэдлэг, мэдээлэл өгнө.