Монгол Улсын Засгийн газрын 2024 оны 96 дугаар тогтоолоор жил бүрийн 3 дугаар сарын эхний долоо хоногт “Музейн нээлттэй өдрүүд” арга хэмжээг зохион байгуулахаар шийдвэрлэсэн. Гэхдээ энэ жилийн хувьд Үндэсний Цагаан сарын баяр давхацсан тул Соёл, спорт, аялал жуулчлал, залуучуудын сайдын тушаалаар уг арга хэмжээг 2025 оны 3 дугаар сарын 7-13-ны өдрүүдэд зохион байгуулахаар болжээ.

Энэ хугацаанд төрийн болон орон нутгийн 35 музей байнгын үзүүлэгийн танхимаараа иргэддээ үнэ төлбөргүй үйлчлэх бөгөөд “Бүсчилсэн хөгжил ба эх оронч үзэл” сэдвийн хүрээнд олон нийтийн оролцоог хангах тусгай үзэсгэлэн, боловсролын хөтөлбөр, лекц, уулзалт хэлэлцүүлэг зэрэг арга хэмжээнүүд зохион байгуулагдана.

Мөн энэ жил оюутан, залуучуудын оролцоог нэмэгдүүлэх зорилгоор Монголын оюутны холбоотой хамтран их, дээд сургуулийн парламентын мэтгэлцээний клубүүдийн дунд "Монголчуудын түүх, соёлын өв, музей" сэдвээр “Уран илтгэлийн уралдаан”, “Мэтгэлцээн” зохион байгуулагдах юм.

Эх сурвалж: Соёл, спорт, аялал жуулчлал, залуучуудын яам