УИХ-ын гишүүдийн нэр бүхий 27 гишүүн гарын үсэг зурсан Засгийн газрыг огцруулах эсэх асуудлыг маргааш УИХ-ын нэгдсэн чуулганаар хэлэлцэнэ. Хэдийгээр УИХ дахь МАН-ын бүлэг мягмар гаригт хуралдаж, олонхийн саналаар “Засгийн газрыг огцруулах шаардлагагүй” гэдэг шийвэрт хүрсэн ч “эсэргүү” гишүүд нь огцруулах ёстой үндэслэлүүдээ үргэлжлүүлэн тавьсаар байна. Өчигдөр хуралдах ёстой байсан Аюлгүй байдал гадаад бодлогын байнгын хорооны хуралдаан ирцгүй хүрээгүй шалтгаанаар хойшилсны дараа гишүүн Н.Номтойбаяр сэтгүүлчдэд мэдээлэл хийж, “АТГ-аас Засгийн газрын зургаан сайдад эрүүгийн хэрэг үүсгэсэн” хэмээн мэдэгдлээ.

Мөн мягмар гаригийн орой хуралдсан Төрийн байгуулалтын байнгын хороо “Засгийн газрыг огцруулах нь зүйтэй” гэж үзэж, шинэ Ерөнхий сайдыг томилох хүртэл Ерөнхий сайдын үүргийг Шадар сайд гүйцэтгүүлэхээр санал дүгнэлтээ гаргасан байгаа. Өнөөдөр Аюулгүй байдал гадаад бодлогын хороо хуралдаж, огцруулах үндэслэлд дурдагдсан “Монголын тагнуулын байгууллага гадаадын тагнуулын байгууллагатай хамтарч ажилласан” гэх асуудлыг хэлэлцэх ёстой. Үүний дараа буюу маргааш УИХ-ын нэгдсэн чуулганаар Засгийн газрыг огцруулах эсэх асуудлыг хэлэлцэх юм.

Уг нь ЖДҮ-ийн зээлийн зүй бус зарцуулалтыг анх гаргаж тавьсан нь Засгийн газар өөрөө. Тодруулбал, Сангийн сайд Ч.Хүрэлбаатар. Гэтэл энэ нь эргээд Засгийн газрыг өөрийг нь хөмрөх хэмжээнд аваачих юм гэж хэн санах билээ. Нэгэнт уг зээлийн асуудалд Засгийн газрын цөөнгүй гишүүн нэр холбогдоод, Ерөнхий сайд нь тэдэндээ хариуцлага тооцохыг хүсэхгүй байгаа тохиолдолд огцруулах санал оруулж ирсэн гишүүдийг буруутгах аргагүй. Гэвч огцорсны дараа яах вэ? Огцрохгүй бол бас яах вэ? гэдэг асуулт хариултаа нэхэж байна. Яг үнэндээ “огцруулна, огцруулахгүй” хэмээн талцаж байгаа улстөрчдийн дотор жинхэнээсээ татвар төлөгчдийн мөнгөөр найрласан төрийн албан тушаалтнуудыг хуулийн өмнө аваачих, учирсан хохирлыг нөхөн төлүүлэх хүсэл сонирхолтой хүн байна уу, үгүй юу?

Эсвэл энэ боломжийг ашиглаад хэн нь илүү хүчтэйгээ үзэх, эрх мэдлээ тогтоох гэсэн тэмцэл яваад байна уу? Нэгэнт эхэлсэн, ил гарсан ЖДҮХС-гийн зээлийн асуудлаар хуулийн хүрээнд хэнд ямар хариуцлага тооцох вэ? Улстөрчид нь үүнийг хийхгүй юм бол өөр хэн үүнийг хийх ёстой вэ? Ерөөсөө Монголд хуулийн засаглал гэж юм байсан уу, хууль хүн бүрт тэгш үйлчилдэг үү? Гэх мэтчилэн асуултын хариуг иргэд авахыг хүсч байна. ЖДҮХС бол төсвийн хөрөнгөөр гараа угааж ирсэн Засгийн газрын тусгай сангуудын зөвхөн нэг нь. Ганцхан санг ухахад ингэж тэвдэж Засгийн газар нь ганхаж, УИХ нь тарахдаа тулж байгаа юм чинь нөгөө сангуудыг нь ч бас “дэлбэлээд” эхэлбэл эд бүр бие биенээ алах нь ээ.

Б.ЗАЯА