Нэг сая хүртэл төгрөгийн үнийн дүнтэй, банк хоорондын гүйлгээг шуурхай гүйцэтгэдэг болсон. Тодруулбал 2014 оны зургадугаар сараас эхлэн банк хоорондын гүйлгээ 24/7 цагийн горимд шилжсэн юм.

Харин арваннэгдүгээр сарын 27-ноос эхлэн гүйлгээний үнийн дүнг өсгөн, 3 сая төгрөг болгожээ.

АХБ-ны санхүүжилтээр Монголбанканд “Банк хоорондын сүлжээ” төслийг хэрэгжүүлсэн байна. Төв банк төлбөр тооцооны системээ шинэчилж, гүйлгээний үнийн дүнг өсгөжээ. Мөн хугацааг богиносгон, 3-4 секундын дотор хүлээн авагч тал мөнгөө авах боломжтой болжээ. 

Бага дүнтэй төлбөр тооцоо гэдэгт

-Байгууллагаас байгууллага,

-Байгууллагаас иргэд,

-Иргэдээс байгууллага,

-Иргэдээс иргэд хооронд шилжүүлэх 3 саяас доош мөнгөн дүнтэй гүйлгээг бэлэн бусаар хийхийг хэлдэг.

Банкны салбараар, интернэт, цахим банк болон гар утсаар хийж буй орлого, шилжүүлэг болон бүх төрлийн гүйлгээг шуурхай гүйцэтгэдэг. Төлбөр тооцоог 24/7 бодит цагийн горимоор дамжуулдаг болсноор иргэд цаг алдахгүй болсноос гадна  

-Бэлэн мөнгөний хэрэглээ буурах,

-Банк санхүүгийн үйлчилгээ илүү хялбар, найдвартай, шуурхай болох,

-Бэлэн бус төлбөр тооцооны хэрэглээ өсөх,

-Иргэдийн банкинд итгэх итэгэл өсөх,

-Жижиг дунд бизнес эрхлэгчид бизнесийн цар хүрээгээ өргөтгөх зэрэг давуу талуудтай. 

Гурав хүртэлх сая төгрөгийн төлбөрийг байршил, өдөр хамааралгүй аль ч цагт 1-4 секунтэд гүйцэтгэх бүрэн гүйцэтгэснээр цахим төлбөр тооцоо гүйцэтгэх үйл ажиллагаа дахин нэг шат ахиж, эдийн засаг дахь мөнгөний эргэлтийг хурдасгах чухал ач холбогдолтой. Иргэд болон банкуудаас ирүүлсэн хүсэлтийг сайтар судалж, холбогдох судалгаа тооцооллыг хийсний үндсэн дээр энэ шийдвэрийг гаргажээ. Цахим төлбөр тооцоог нийтийн хэрэглээ болгож хэвшүүлэхэд дэмжлэг үзүүлж байна гэж Төв банкнаас мэдээлэв.