Боловсрол, шинжлэх ухааны сайдын тушаалын дагуу “Олон улсад хүлээн зөвшөөрөгдсөн цахим контент, дижитал сурах бичгийн цахим систем нэвтрүүлэх" төслийг хэрэгжүүлэхээр баталсан бөгөөд энэ хүрээнд Унгар улсын "MOZAIK KIADO KFT" ХХК сонгогдож, гэрээ байгуулан хамтран ажиллаж эхлээд байна.

Хөтөлбөрийн хүрээнд ерөнхий боловсролын сургуулийн 6-12 дугаар ангийн нийт 100 сурах бичгийг дижитал хэлбэрт шилжүүлж, Mozaik education системд оруулаад байгаа бөгөөд интерактив 3D контент, видео контент, зураг, аудио, 170 гаруй хичээлийн хэрэглэгдэхүүнийг бэлтгэж байна.

Дижитал сурах бичгийн системийг танилцуулах, түгээн дэлгэрүүлэх зорилгоор үндэсний сургагч багш бэлтгэх сургалтыг гурван өдрийн турш танхимаар зохион байгуулж байна. Уг сургалтад Боловсролын ерөнхий газар, Боловсролын судалгаа, үнэлгээний төв, Боловсролын мэдээллийн технологийн төвийн мэргэжилтнүүд, 21 аймаг, 9 дүүргийн төлөөлөл бүхий нийт 60 оролцогч хамрагдаж байна.

Сургалтын нээлтэд Боловсролын яамны Ерөнхий боловсролын газрын дарга М.Цогзолмаа, Мозаун ХХК-ийн ерөнхий захирал Ч.Энхбат, Боловсролын ерөнхий газрын Сургалтын хөтөлбөрийн хэрэгжилт, үнэлгээний хөгжлийн газрын дарга Б.Лхагвабаяр нар оролцож, сургалтын зорилго, зохион байгуулалт, хөтөлбөрийн агуулга, үр дүн, цаашдын төлөвлөгөөний талаар танилцууллаа.

Үндэсний сургагч багш нар цаашид дижитал сурах бичгийг нийт багш нарт түгээн дэлгэрүүлэх ажлыг хэрэгжүүлэх бөгөөд сурах бичгүүд бүрэн цахим хэлбэрт шилжсэнээр сурагчид интерактив хэлбэрээр ашиглах боломжтой болох юм.

Эх сурвалж: Боловсрол, шинжлэх ухааны яам