Америкийн Лас-Вегас хотноо энэ сарын 7–11-ний өдрүүдэд ахуйн цахим техникийн олон улсын үзэсгэлэн явагдаж өнгөрлөө. Жил бүр олны анхаарлыг татдаг үзэсгэлэн дээр танилцуулсан ер бусын, санаанд оромгүй таван топ гажетыг сонирхуулъя.

Зургийг: Yahoo

1. Давсны цахилгаан халбага
Давснаас татгалзах эсвэл хэмжээг нь багасгах гэдэг ихээхэн ээдрээтэй асуудал. Түүнийг энэ цахим төхөөрөмжөөр зохицуулахыг япончууд санал болгож байна. Одоогоор зөвхөн Японд худалдаж байгаа төхөөрөмж нь илүү нэмэлт амтлагчгүйгээр хоолны давсыг “тааруулна”.
Гажет бидний иддэг натрийн ионыг өөртөө цуглуулж, хоол давстай мэт мэдрэмжийг өгдөг. Ийм халбаганы үнэ $127.

Зургийг: Lifehacker

2. Халуун хоол, унд хөргөж өгдөг робомуур
Бас нэг ер бусын Nékojita FuFu төхөөрөмжийг япончуудын Yukai Engineering компани бүтээн танилцуулав. Гажет хоол ундыг хөргөж өгдөг. Түүнийг аягандаа буюу гүнзгий савны хананд наалдуулдаг. Таны шөл эсвэл цайг янз бүрийн хүч, хурдаар үлээж хөргөнө.
Nékojita гэдэг нь "муурны хэл", FuFu нь хоолоо үлээх дууг илэрхийлдэг аж. Бүтээгчид нь робомуур хоолны халууныг 88-аас 71 °C хүртэл гурван минут, 66 °C хүртэл таван минутын дотор хөргөнө гэж тайлбарлав.

Зургийг: Homecrux

3. Хурхиралтын эсрэг зохиомол ой ухаантай дэр
Нойрыг илүү тайван болгодог ашигтай төхөөрөмжийг үзэсгэлэн дээр үзүүлэв. Энэ нь зохиомол ой ухаантай дэр юм.
Эхлээд 10 Minds компанийн бүтээсэн дэр хэрэглэгчийнхээ нойрны хугацаа, хурхирч эхлэх мөчийг тогтооно. Дараа нь хурхирах үед дэр нь агаарын уутнуудаа үлээн томорч, жижгэрч толгойн байрлалыг өөрчилдөг. Энэ гажетын үнэ $700.

Зургийг: Engadget

4. Нарны зайтай бүрх малгай
EcoFlow Power Hat нэртэй бүрх малгай нь USB-A болон USB-C оролтоор цахим төхөөрөмжүүдийг цэнэглэдэг нарны зайн төхөөрөмжөөр тоноглогджээ. Малгайн хүчин чадал бага хэмжээний цэнэг өгнө. Энэ малгай 370 грамм жинтэй ба үнэ нь $129.

Зургийг: ZDNet

5. Чих цэвэрлэдэг чихэвч
Bebird компанийн танилцуулсан EarSight Flow нь камераар тоноглогдсон бөгөөд чихний сувгийн байдлыг харуулж, хулхийг цэвэрлэх, хатаах төхөөрөмжтэй. Тусгай хөтөлбөрөөр чихний байдлыг хянах боломжтой.
Чихэвчийн үнэ $199 бөгөөд энэ оны тавдугаар сард зах зээлд гарах юм байна.

Эх сурвалж: OfficeLife