Европын Холбооноос Монгол Улсад суугаа Төлөөлөгчийн газраас өчигдөр Сүхбаатарын талбайд "Европын өдөрлөг"-ийг зохион байгууллаа.
Европын Холбооноос Монгол Улсад суугаа Онц бөгөөд Бүрэн эрхт Элчин сайд Аксель Никэйз "Энэхүү өдөрлөгийг бид 2019 оноос хойш жил бүр уламжлал болгон зохион байгуулж ирсэн. 2020, 2021 онд цар тахлын улмаас хийгээгүй. Түүнээс хойш уламжлалаа хадгалж тогтмол зохион байгуулж байна. Энэхүү өдөрлөгт Европын Холбооноос Монгол Улсад суугаа гишүүн орнуудын ЭСЯ, тэдгээр улс орнуудын соёл урлагийн байгууллагууд, мөн Европын Холбооны санхүүжилтээр Монгол Улсад хэрэгжиж байгаа төсөл хөтөлбөрүүдийн төлөөлөл оролцож, үйл ажиллагаагаа танилцуулж байна.
Энэ удаагийн өдөрлөгийн онцлог нь соёл болон боловсролын байгууллагуудыг түлхүү оролцуулахад анхаарсан юм. Тухайлбал, Европын Холбооны асарт гэхэд европын улс орнуудад сурах боломж, тэр дундаа Эрасмус+ тэтгэлгийг танилцуулж байна” хэмээв.
Өдөрлөгийн үеэр төв талбайгаар зочилсон дотоод гадаадын иргэд тус холбооны гишүүн орнуудын соёл уламжлалтай танилцаж, үндэсний хоол амттанаар дайлуулж, хөгжөөнт тоглоом тоглож, урлагийн тоглолт үзэж, боловсролын солилцооны хөтөлбөрийн талаар мэдээлэл авч, төгсөгчидтэй уулзаж зөвлөгөө авав.
Монгол Улс болон Европын Холбоо хооронд дипломат харилцаа тогтоосны 35 жилийн ой энэ онд тохиож байна.
