Ирэх дөрөвдүгээр сарын 7-нд Жеки Чан 70 насныхаа ойг тэмдэглэнэ. Тэр тулаант, хөгжөөнт киноны амьд домог билээ. Дэлхийд нэр нь цуурайтсан хүмүүсийг фенүүд нь хөгширдөггүй мэт ойлгох... Гэтэл түүний сүүлийн зурагнууд фенүүдийг нь цочроож байна гэнэ.
Жеки Чантай даатгалын ямар ч компаниуд гэрээ байгуулдаггүй. Учир нь тэр кинондоо өөрөө элдэв трюкуудаа бодож олон, зохион тоглож байнга гэмтэлтэй байдаг. Жеки 69 насандаа ч үүнийгээ орхиогүй.
Саяхан тэр нэгэн бага хурал дээр өөрийнхөө ажлын талаар ярьсан юм.
Цугларсан олон түүнийг сонсохоос илүүтэй, гадаад төрхийг нь харж байв. "Жеки, яана даа? Чи хөгшрөөд байдаг", "Цаг хугацаа хэнийг ч өршөөхгүй юм даа. Гэхдээ л чи сайхан чигээр" хэмээн нэг хэсэг нь сүлжээгээр бичиж, нөгөө хэсэг нь "саяхан Чак Норрис 84 хүрлээ. Цаг хугацаа чи ямар хурдтай гүйнэ вэ?" гэж шагширчээ.
Алдартай жүжигчин 2024 онд хоёр ч киногоо нээхээр төлөвлөжээ.
"Энэ хэдэн арван жилд хичнээн ч гэмтэл авснаа тоолоод барашгүй. Намайг бүх ясаа хугалсан гэдэг. Мэдээж, тэр нь үнэн биш" хэмээн жүжигчин шоглоом болгон ярьжээ.
М.ЦОГТ