УИХ-ын гишүүн, Уул уурхай, хүнд үйлдвэрийн сайд Ж.Ганбаатарын охин Г.Хүслэн Канадын Торонто хотод нээгдсэн, дэлхийн 130 гаруй орны төлөөлөгч оролцсон "PDAC 2024" уул уурхайн үзэсгэлэнгийн нээлт дээр Монголын павильон дээр ажиллаж байгаа зураг нийгмийн сүлжээнд тавигдаж, нэлээдгүй шүүмжлэл дагуулсан билээ. 

Тэгвэл өнөөдөр УУХҮ-ийн сайд Ж.Ганбаатар УИХ-ын чуулганы нээлт дээр уг асуудалд тайлбар хийжээ. Ингэхдээ "Би охинтойгоо гадаадад томилолтоор яваагүй. Төр, улсаа бодоод тусалж байгаа. Төрийн мөнгөөр явсныг баримтаар батлаад ирвэл би хэлье. Манай охин Торонтогийн их сургуулийг төгссөн. Танилцуулга тараагаад зогсож буй оюутнуудыг жил бүр тодорхой хураамж төлөөд хөлсөлж авдаг. Томилогдож явсан яамны гурван ажилтан хаанаа ч хүрдэггүй" гэв.

Уг нь бол Ж.Ганбаатар сайдын хэлсэн зүйл бодитой л доо. Гадаадад байтугай Монголдоо зохион байгуулдаг томоохон үзэсгэлэн, олон улсын арга хэмжээнүүдэд хүч дутахаараа хамгийн түрүүнд "сайн дурынхан" нэрийн дор оюутнуудаа хөлсөлж ажиллуулдаг. Гэхдээ сайдын охины хувьд шүүмжлэлд өртсөн шалтгаан нь сайдад өөрт нь байсан юм болов уу даа. 

Учир нь, Ж.Ганбаатар бол 1995 онд ХУДС-ийг төгсөөд шууд бизнест хөл тавьсан, "Оргил" худалдааны төвийг сүлжээ дэлгүүр болтол өртгөтгөж чадсан "ясны" наймаачин. УИХ-д хоёронтаа сонгогдсон нь үнэн боловч жил хагасын өмнө УУХҮ-ийн сайдаар томилогдоход нь иргэдийн зүгээс "Төрийн ажил албаны ямар ч туршлагагүй чихрийн наймаачинг мэргэжлийн яамны сайдаар томиллоо. Л.Оюун-Эрдэнэ сайдын суудлыг мөнгөөр зарж байна" хэмээн шүүмжилсэн билээ.

Үнэндээ ч түүнийг энэ салбарыг удирдсан жил хагасын хугацаанд энэ салбарт нэг ч ахиц дэвшил, нааштай өөрчлөлт гараагүй. Ер нь  энэ салбарын хүн гэж хэлэх, хүлээн зөвшөөрөхөд ч хэцүү харагддаг. Одоо хэр нь "Оргилын Ганбаа" нэрнээсээ салаагүй яваа нь ч тэр. Энэ шалтгаанаар олны сэтгэгдэл охиноор нь дамжуулаад Уул уурхайн сайдыг өөрийг нь гөрөөлсөн байх талтай.