Төрийн цэргийн болон хууль сахиулах байгууллагын эмэгтэй ахлагч нарын анхдугаар чуулга уулзалт өчигдөр Төрийн ордонд болов. Чуулга уулзалтад оролцож, нээлтийн үг хэлсэн Ерөнхийлөгч У.Хүрэлсүх ХНХ-ын сайд Х.Булгантуяаг өндөр дуугаар загнаж буй бичлэг өчигдөр соошлын гол сэдэв боллоо.
Олон улсын эмэгтэйчүүдийн эрхийн өдөрт зориулсан уг арга хэмжээн дээр Х.Булантуяа сайд санаатай юм шигээр хоцорч ирсэн нь Ерөнхийлөгчийн цухлыг барсан бололтой. Уг нь бол эмэгтэйчүүдийн эрхийн өдөрт зориулсан арга хэмжээ гэдэг утгаараа Х.Булгантуяа сайдын хувьд ч гэсэн хүндэтгэл хүлээвэл хүлээх ёстой хүний нэг. Гэвч энэ удаад хүйсээс илүү салбарын ялгаа гарчих шиг боллоо. Армийн хурандаа явсан Ерөнхийлөгч маань АИХ-ын танхимыг дүүргэж суусан 500 ахлагч бүсгүйг үл хүндэтгэсэн шалтгаанаар Х.Булгантуяа сайдыг мөрдэстэй хатагтай нарын өмнө бөндөгнөтөл загнаж байгаад бөхийлгөж дөнгөв.
Саяхан л МАН-ын залуу халаа, хөөрхөн "гүнжү" нарын нэг гэгдэн ах нарынхаа өмнө хэлээ хазаж явсан Х.Булгантуяа сайдын нулимсаа залгин нуруу бөхийсөн хийгээд Ерөнхийлөгчийн "ноён нуруу" хаана очиж хугардгийг хамтад нь харсан армийн бүсгүйчүүд ханцуй дотроо мушийж суусан нь лавтай. Харин сайдад өөрт нь ямар байсныг бол таахын ч хэрэггүй.
