Эдийн засгийн байнгын хорооны өнөөдрийн хуралдаан дээр валютын ханшийн талаар Байнгын хорооны гишүүдэд  Монголбанкны Ерөнхийлөгч Н.Баяртсайхан мэдээлэл хийж байна. Тэрбээр байнгын хорооны гишүүдэд валютын ханшийн талаар мэдээлэл өгөх үеэрээ доорх мэдээллийг хийсэн юм. 

Монголбанкны Ерөнхийлөгч Н.Баяртсайхан "Нэг сайн мэдээ дуулгамаар байна. Юу гэхээр өчигдөр шөнө Хөгжлийн банк гадаад санхүүгийн зах зээл дээрээс 500 сая ам.долларыг таван жилийн хугацаатай жилийн 7.25 хувийн хүүтэйгээр амжилттай босголоо. Энэ бол ямар нэгэн Засгийн газрын баталгаагүйгээр Хөгжлийн банк өөрөө явж босгосон мөнгө гэж үзэхээр Монголбанкны зүгээс амжилт гэж харж байгаа.

Энэ мөнгийг босгосон явдал бол манай гадаад валютын улсын нөөцөд учрах байсан дарамтуудыг тодорхой хэмжээгээр бууруулж өгч байна. 2019 он гараад 380 орчим ам.долларын өр төлөх хугацаа, график нь гарсан байгаа. Хугацаа тулсан өр төлбөрөө барагдуулах сакнхүүгийн эх үүсвэртэй болж байгаа нь Монгол Улсын гадаад валютын нөөцөд ирэх дарамтыг багасгаж байна. Мөн цаана нь Монгол төгрөгийн ханшийг тогтворжуулах алхам боллоо" гэв.

Үргэлжлүүлэн Монголбанкны Ерөнхийлөгч Н.Баяртсайханаас гишүүд асуулт асууж, хариулт авч байна. Тухайлбал, УИХ-ын гишүүн О.Баасанхүү: Вальютын ханш хэзээ буурах вэ. Монголбанк дахиж мөнгө хэвлэх үү? гэхэд  Н.Баяртсайхан "Вальюын ханш хэзээ буурахыг хэлж мэдэхгүй. Мөнгө хэвлэх үйл ажиллагааг зогсоосон. ОУВС-гийн шаардлага ч мөнгө хэвлэхийг хориглосон байдаг" гэлээ.

Мөн байнгын хорооны дарга, УИХ-ын гишүүн Д.Дамба-Очир "Ойрын үед тулгамдаж, төлөх гэж байгаа зээл байна уу" гэх асуултыг Засгийн газарт тавилаа. Харин Сангийн дэд сайд Х.Булгантуяа "Үндсэн төлбөр төлөх өр байхгүй. Гадаадын бондуудын үйлчилгээний төлбөр бол төлнө" гэх хариултыг өгсөн юм.