Цахим хөгжил, харилцаа холбооны дэд сайд Б.Болор-Эрдэнийн нэг жил орчмын өмнө буюу 2021 оны 10 дугаар сард болсон олон улсын хуралд оролцож байх үеэрээ хэлсэн үг нийгмийг цочролд оруулав. Тэрээр тав дахь жилдээ зохион байгуулагдсан “Ирээдүйн хөрөнгө оруулалтын санаачилга” олон улсын хуралд "Төрийн албаны анхан болон дунд шатны албан хаагчид Орост боловсрол эзэмшсэн хүмүүс байсан нь Засгийн газарт тулгарсан гол асуудал" хэмээн байр сууриа илэрхийлсэн юм.
Тэгвэл энэ талаар УИХ дахь МАН-ын бүлгийн дарга Д.Тогтохсүрэн "Хувь хүний байр суурь байсан болов уу. Аль ч оронд өмнөх үеэ шүүдэггүй. Нийгмийн үйл явцад Орост сургууль төгссөн хүмүүс гай болоод, чирэгдээд байгаа зүйл байхгүй байх гэж бодож байна. Ёс зүйн хариуцлага тооцох эсэх нь Засгийн газрын асуудал" гэлээ.
