Сангийн сайд асан Ч.Хүрэлбаатар, Аса Ч.Дагвардорж нар өнгөрөгч намар Хаан банкны асуудлаас болж соошлаар ширүүхэн тулсан билээ.

Ч.Хүрэлбаатар гишүүн УИХ-ын чуулганы хуралдааны үеэр “ХААН банкны 60 хувийг хэн авсан бэ? Цэвэр мөнгө мөн үү?” гэж асуусны дараа Ч.Дагвадорж аварга “Муусайн дөрвөдүүдийг алсан ч яадаг юм. Дандаа хагалан бутаргах санаатай. Баядуудыгаа байнга дээрэлхэнэ, муусайн гөлөгнүүд” гэх мэтчилэн соошлаар агсан тавьж, Ч.Хүрэлбаатар нь хариуд нь, “Юун гуя? гэдэг болов. ХААН-ын луйварт оролцсон нөхөд эхнээсээ үсрээд гараад ирлээ, удахгүй бусад нь ч гарч ирнэ. Нүүрс, төмөр замын хулгайгаар хөлжигсөд, ард түмний өмч хөрөнгийг шамшигдуулагчид, эрүүл мэнд, тэтгэврийн сангийн тонуулчдад доромжлуулна гэж харин ч байхгүй. Бага сагаарай” хэмээн жиргэж байсан билээ.

Гэвч энэ явдлаас хойш жилийн дараа Асашёрюү Д.Дагвадорж Ч.Хүрэлбаатараас уучлал гуйжээ. Тэр өөрийн соошил хуудсаар дамжуулж “Та бид хоёр муудаад ойндоо хүрэх нь. Миний хэлсэн үг хүндээр туссан бол үгээ буцаая, уучлаарай. Эр улсууд маргаа л биз. Увсын ард түмнийг муулаагүй юм шүү, надад ч гэсэн олон найз бий. За тэгээд амжилт” хэмээн бичжээ. Ч.Хүрэлаатар ч гэсэн аваргын уучлалтыг хүлээж авснаа бичээд амжилт хүссэн байна.

Гэвч энэ хоёр хүний харилцааны гэнэтийн энэ “дулаарал” олон хүний хувьд “сэжиг бүхий” харагдаж байгаа бололтой. Ялангуяа Ч.Хүрэлбаатар нь энэ удаа Эдийн засгийн хөгжлийн сайд болсон хийгээд Аса аваргын ах, хотын дарга Д.Сумъяабазарын хэрэгжүүлэхээр улайрч буй хотын төмөр зам буюу LRT төслийг "хэзээ ч хэрэгжүүлэхгүй" гэж хэлснээс хойш удаагүй байхад хоёр эрхэм харилцан гар барьсан нь ч тэр. Түүнчлэн арав гаруй жил хэл ам таталж байгаа Аса цирк, Үндэсний хөрөнгө орулалтын банкны асуудал чухам хаашаа эргэх бол хэмээн олон хүн сэтгэл түгшиж байна. Хуучин цагт “Баяд хэрэлдвэл барлагийн биед цус” гэж ярьдаг байлаа. Орчин үед тэдний хэрэлдэх биш, хэлхэлдэх нь илүү аюултай харагддаг болчихоод байгаа.