УИХ-ын гишүүн Д.Сарангэрэл амьжиргааны түвшин доогуур иргэдийг "Манай яамныхан Улны айл гэж нэрлэдэг" гэж хэлээд Хөдөлмөр, нийгмийн хамгааллын сайдын албан тушаалаасаа огцорсон билээ. Мөн тэрээр төд удалгүй Нийгмийн бодлогын байнгын хорооны хорооны хурал дээр "Улны айл гэдэг үгээр их хөөцөлдөж байна. Ул гэдэг үг надтай хамт яамнаас явсан. Та бүхэн айлтгүй. Гэхдээ айл нь үлдсэн. Манай Монголчууд үг хөөхөөр үхэр хөө гэдэг юм. Үхэр гэдэг үгийг тэр ядуу айлуудаа гэж ойлгоорой" хэмээн дахин иргэдийг доромжлоод авсан.
Түүнийг иргэдийг ялгаварлан гадуурхаж, Үндсэн хууль зөрчсөн гэж үзэж албан тушаалаас нь чөлөөлсөн байхад дахин ийм үйлдэл гаргасан харамсалтай.
Гэвч удаа дараагийн үйлдэл, үгээр иргэдээ доромжилдог гишүүн Д.Сарангэрэлийг УИХ-ын дэд даргаар томилох тухай асуудал Төрийн ордонд яригдаад эхэлжээ.
Өчигдөр УИХ-ын дэд дарга Т.Аюурсайхан нь Хөдөлмөр нийгмийн хамгааллын сайдаар томилогдсон тул тэр суудал хатантанд "сэнтий" мэт харагдсан бололтой. Иргэдийг доромжлогч Д.Сарангэрэлийг ийн УИХ-ын Дэд даргын суудал руу зүтгүүлж байгаа нь Монгол улсын иргэдийг ялгаварлан гадуурхаж болно гэсэн дохио болох биз.
Дашрамд, УИХ-ын Д.Сарангэрэлийг Үндсэн хууль зөрчсөн тул гишүүнээс эгүүлэн татах асуудал иргэдийн дунд яригдсаар байна. Түүний хийсэн эдгээр үйлдлийг шалгуулахаар иргэн Э.Түвшинбаяр Үндсэн хуулийн цэцэд хандаад байгаа билээ.
Иргэн Э.Түвшинбаяр "УИХ-ын гишүүн Үндсэн хууль зөрчсөн бол Цэц дүгнэлт гаргана гэсэн заалттай. Гишүүн Д.Сарангэрэл нь иргэнийг нийгмийн гарал, хөрөнгө чинээ, эрхэлсэн ажил албан тушаалаар нь ялгаварлан гадуурхсан. Энэ нь Үндсэн хуульд тод томруунаар заасан хүний эрхэд халдсан" гэсэн юм.