Боловсрол, шинжлэх ухааны яамнаас багш нарын боловсролын баримт бичигт хийсэн шалгалтын үр дүнг өчигдөр танилцуулсан. Тус шалгалтаар 442 диплом зөрчилтэй байгааг тогтоосон аж.
Үүнтэй холбоотойгоор иргэдийн зүгээс багш нартай ижил түвшинд төрийн алба хаагчид, албан тушаалтнуудыг шалгах нь зүйтэй хэмээн шаардаж эхэлсэн юм.
Мөн цахим орчинд Ерөнхий сайд Л.Оюун-Эрдэнэ, Засгийн газрын хэрэг эрхлэх газрын дарга Д.Амарбаясгалан нарыг Монгол Улсын Их Сургуулийг төгссөн нь эргэлзээтэй гэх хардлага үүсэж, зарим төгсөгчид цуг сурч байгаагаагүй гэдгээ илэрхийлж байна.
Тэгвэл уг асуудалтай холбоотойгоор ЗГХЭГ-ын дарга Д.Амарбаясгалан тайлбар өглөө.
Тэрээр "Ерөнхий сайд бид хоёрын хувьд МУИС-ийг төгссөн байдал бол бодитой. Хичээл заасан багш, хамт суралцсан нөхөд маань байна. Мөн бакалаврын диплом хамгаалсан сэдэв маань тодорхой байна. Тиймээс үүнд эргэлзэх хэрэггүй. Яагаад гэвэл улсын бүртгэлд орсон, дипломын дугаар нь яаманд бүртгэлтэй байгаа. Эргэлзээд байх юм байхгүй.
Ер нь хуурамч дипломын асуудлыг Боловсролын сайд хөндөж гаргаж ирсэн нь зөв юм. Энэ асуудал зөвхөн боловсролын салбараар хязгаарлагдах ёсгүй. Төр бүх түвшиндээ үүнд анхаарах хэрэгтэй, хэрэгцээтэй.
Ерөнхий сайд бид хоёрын хувьд 2009 оны зургаадугаар сарын 2-нд хамтдаа тухай үеийн МАХН-ын Хэрэг эрхлэх газарт газрын дарга нараар томилогдож байсан. Нэг нь инженер, нөгөө нь сэтгүүлч мэргэжилтэй хоёр хүн орж байлаа. Бид хоёрт нэмэлтээр улс төрийн шинжлэх ухааны чиглэлээр суралцах зайлшгүй шаардлага гарсан. Тэгээд МУИС-ийн хэрэгжүүлж байсан бакалаврын программд хамрагдсан.
Бид дипломоо үзүүлэх нь нээлттэй. Бидний дипломыг биднээс үзэх биш боловсролын салбарын системээс харах бүрэн боломжтой. Иргэд маань зорилготой худал, ташаа мэдээлэлд автаж, хардаж сэрдэхээсээ өмнө шалгачихдаг байх хэрэгтэй. Би энд дипломны тайлбар хийгээд суух шаардлага байхгүй" гэлээ.