Нийслэлийн Ардчилсан намын дарга Э.Бат-Үүл өнөөдөр Путины түрэмгийллийг эсэргүүцэж "Монголоо Беларусь Болгохгүй!" цуглааныг Тавдугаар сарын 11-нд Сүхбаатарын талбайд зохион байгуулах болсон талаар мэдэгдэв.
Мөн тэрээр Эрх чөлөө, тусгаар тогтонолоо хамгаалан Путинчүүдын эсрэг, Дайны эсрэг ардчиллаа баталгаажуулах цуглаанд ард түмэн, намын гишүүдээ хүрэлцэн ирэхийг уриалсан юм.
Хэвлэлийн мэдээлийн үеэр намын зарим гишүүд эсэргүүцэл илэрхийлж, зодоон хийж, хэвлэлийн хурлыг бусниулахыг оролдсон юм.
Тэрээр мэдэгдэлдээ "Иргэдээ, Ардчилсан намын гишүүдээ, Монголын Ардчилсан нам бол улс орноо Зөвлөлтийн колоничлолоос чөлөөлөн түүхэн дуудлагаар бий болсон нам билээ. Тиймээс үндэсний эх оронч үзэл манай намын тулгуур үзэл байсаар ирсэн юм. Бидний үзэл санаа дахин түүхэн сорилттой тулгарлаа. Хэрэвзээ Х.Баттулга, Оросын элчин сайдын хүсч байгаачлан Монголын Ардчилсан нам Путины тавдугаар цуваа болох аваас Монголын ардчилал устаж, бүрэн эрхэт байдлаа алдана. Үүнийг ямар ч монгол хүн зөвшөөрөхгүй. Тиймээс цаг алдалгүй тэмцэцгээе. Монголоо Беларусь болгохыг эсэргүүцэцгээе" хэмээн онцолсон юм.
Мөн тэрээр "Ардчилсан намаас Путины гар хөлийг хөөн зайлуулах болно. Энэ үйл ажиллагаанд манай намын гишүүн Х.Баттулга манлайлан оролцож байна. Үүнийг хүлээн зөвшөөрөхгүй. Ардчилсан нам бол үндэсний эрх чөлөөт үзэлтэй нам. Дайныг эсэргүүцсэн монгол иргэдийг, залуусыг хааж, хавчиж, мөрдөх байдал эрчимжиж байна. Үүний эсрэг тэмцэх болно" гэсэн юм.