Шөнө оройн цагаар хүмүүс гэнэт “эмо” зүйл бичдэг, согтуудаа үнэнээ өчдөг, хайртай хүнийхээ тухай сэтгэгдлээ олон нийтийн сүлжээнд оруулдаг, харин өглөө түүнийгээ устгадаг тухай “UB comedy”-ийн залуус ярьсан нь бий. Тэгвэл өчигдөр Хуульчдын холбооны тэргүүн Ж.Хунан урд оройжингоо салбарынхныгаа, холбооныхоо гишүүдийн  нэг хэсэг болсон шүүгчид рүү дайрчихаад өглөө нь устгасан байв. Албаны ёс зүйгээ бодсон уу, арай л хөнгөдсөн санагдсан уу, хэн мэдлээ. 

Ийнхүү бухимдсан шалтгаан нь шүүхэд ялагдсантай нь холбоотой бөгөөд олон нийтийн сүлжээнд уур бухимдлаа тайлж буй бололтой. Тодруулбал, түүний ээж нь 60 нас хүрсэн тул шүүгчийн ажлаас чөлөөлөгдөж тэтгэвэртээ гарчээ. Гэвч “65 хүртлээ ажиллах ёстой” гэж шүүхдээд шүүх гомдлыг нь авч хэрэгсээгүй юм байна. 

Шүүгч, прокурор, өмгөөлөгч, бусад бүх хуульчдыг эгнээндээ нэгтгэсэн албан ёсны байгууллагын тэргүүн нь “Сүүлийн таван жил шүүгч болсон, дээд шатны шүүгч болсон бүх шүүгчийг шалгах хэрэгтэй“ гэх зэргээр соошлаар бичсэн нь түүний хувийн байр суурь уу, цаашид хуульчдын холбооноос хэрэгжүүлэх бодлогын нэг хэсэг үү гэдгийг харж л байя.

Б.АНХМАА