Монгол улсын 58 иргэнийг Польшийн хилээр татаж авч эх оронд нь ирүүлэх ажиллагааг ГХЯ, Польш дахь Элчин сайдын яам амжилттай зохион байгуулсан бөгөөд Польш улсын хил нэвтэрсэн нийт иргэдээс 18 нь Монгол руу ниссэн, гурав нь Монголд ирсэн. Харин 15 нь Истанбулд байгаа аж. Тэд өнөөдөр эх орондоо ирнэ.
Энэ талаар Гадаад харилцааны сайд Б.Батцэцэг Засгийн газрын хуралдааны дараа мэдээлэл өгөв.
Тэрээр "АНУ болон зарим орнууд хоёрдугаар сарын 11-нээс эхлээд иргэддээ шаардлага хүргүүлж ажиллаж эхэлсэн. Манай улс хоёрдугаар сарын 13-наас иргэддээ эх орондоо даруй буцах уриалга хүргүүлсэн. Энэ хугацаанд 41 оюутан эх орондоо ирснийг урьд нь мэдээлж байсан.
Өргөмжит консулын байрлаж байгаа газар Киев хотод байдаг бөгөөд түүнийг өөрийнхөө хэмжээнд сайн ажилласан гэж үзэж байгаа. Харьков хотод 18 оюутан хамгийн сүүлд үлдсэн. Польш улсын Элчин сайдын яаманд хоёр дипломат ажилтан ажилладаг. Маш их ачаалалтай ажилласнаас үүдэн буруу мэдээлэл өгсөн, цагийн зөрүүнд орсон асуудал бий.
Оюутнуудын гомдлыг нягталж шалгаад хариуцлагын арга хэмжээ авна.
Нэн түрүүний зорилт бол дипломат ажилтнуудад арга хэмжээ авахаас илүү хүүхдүүдээ татаж авах нь чухал байсан. Бид нөхцөл байдлыг үнэлээд тодорхой хэмжээний хариуцлагын асуудал ярина" гэлээ.
