"No double standart” хөдөлгөөний зохицуулагч Д.Монголхүү өнөөдөр мэдээлэл хийлээ.

Тэрээр "Украинд дайны бүсэд олон монгол оюутан гацсан. Гадаад харилцааны яамаас тэдгээр оюутнуудтай 24 цагийн турш холбоотой байгаа гэж мэдээлсэн. Гэвч бодит мэдээллийг авахаар яам дээр очиход хаалттай хаалга мөргөлөө. Метроны хонгилд хонож байгаа оюутнууаас ирж байгаа мэдээллээр "Амь нас, эрүүл мэнд нь цаг минутаар хэмжигдэж байгаа" гэдгийг хэлсээр байна. Гэтэл Гадаад харилцааны яам нь амралтын өдрөөр амарч байх жишээний. Хамгийн гол нь яах гэж Элчин сайдын яам гэж байдаг юм. Онцгой бүрэн эрхийнхээ хүрээнд мэдээлэл цуглуулж, дүгнэлт, прогноз гаргаж нөхцөл байдал хаашаа эргэхийг урьдчилан таамаглах ёстой биз дээ. Улмаар иргэдээ нүүлгэн шилжүүлэх, өөрийн иргэдээ хамгаалах үндсэн үүрэгтэй.

Гэтэл нөхдүүд иргэдээ авч чадсангүй. Тэд бүх юмыг л болж, бүтээд байгаа юм шиг мэдээлээд байгаа. Гэвч бодит байдал дээр Польш улсад байгаа монгол иргэд өөрсдийнхөө нөөц бололцоогоор 13 хүүхдийг Украинаас гаргаж авч чадсан байна. Украинд 20 гаруй хүүхэд үлдсэн гэх мэдээлэл байна.

XXI зуунд ОХУ хүчирхийллийн аргаар асуудлаа шийдэх гэж оролдож байгаа дэлхийн улс орнууд дэмжихгүй гэдгээ илэрхийлсэн. Тиймээс "No double standart", "Хэвтүүл", "Монгол туургатны төв холбоо"-дууд нэгдэж дуу хоолойгоо хүргэхээр шийдсэн. Бид маргааш төв талбай дээр тайван жагсана. Дэлхийн иргэдтэй хамт дуу хоолойгоо хүргэе. Харин Монголын төр ямар байр суурь баримталж байгаа вэ гэдгээ олон улсад зарлаж, илэрхийлмээр байна. Чимээгүй дүлий дүмбэ байгаа нь зохимжгүй бас аюултай байна" гэлээ.