"Эрдэнэс Тавантолгой" ХК "Тэрбум мод" үндэсний хөдөлгөөнд нэгдэж уур амьсгалын өөрчлөлтийн нөлөөллийг бууруулах, цөлжилт, газрын доройтолтой тэмцэх, ой мод, ойн санг нэмэгдүүлэх, усны эх үүсвэр, нөөцийг хамгаалах, экологийн тэнцвэрт байдлыг хангах зорилтыг дэмжин, мод тарьж ургуулж, цаашид арчлан хамгаалахаа батламжиллаа.

Монгол Улсын Ерөнхийлөгч У.Хүрэлсүхийн санаачилсан “Тэрбум мод” үндэсний хөдөлгөөнд уул уурхайн чиглэлээр үйл ажиллагаа явуулдаг томоохон компаниуд нэгдлээ.

Байгаль орчин, аялал жуулчлалын яам аж ахуйн нэгжүүдийг мод тарьж ургуулах арга, аргачлал, технологийн нэгдсэн зөвлөмжөөр хангаж, бүх талаар дэмжих юм.

Батламжид Байгаль орчин, аялал жуулчлалын сайд Н.Уртнасан болон аж ахуйн нэгжүүдийн удирдлага, төлөөлөл гарын үсэг зурлаа.

Эхний ээлжинд нэр бүхий 21 аж ахуйн нэгж 608 сая 500 мянган мод тарьж ургуулахаа батламжиллаа.

Үүнд:

1. “Эрдэнэс Тавантолгой” ХК 180,000,000
2. “Эрдэнэс Оюутолгой” ХХК , “Оюу толгой” ХХК 100,000,000
3. “Болдтөмөр Ерөө Гол” ХХК 100,000,000
4. “Эрдэнэт үйлдвэр” ТӨҮГ 100,000,00
5. “Энержи Ресурс” 40,000,000
6. “Өсөх Зоос” ХХК 30,000,000
7. “Саусгоби Сэндс” ХХК 15,000,000
8. “Степ Голд” ХХК 10,000,000
9. “Тавантолгой” ХК 6,000,000
10. “Бадрах Энержи” ХХК 5,000,000
11. “Эрдэнэс Монгол” ХХК 5,000,000
12. “Бороо Гоулд” ХХК 3,000,000
13. “Эрдэнэс Силвер Ресурс” ХХК 3,000,000
14. “Бүрдэл Майнинг” ХХК 2,500,000
15. “Алтайн Хүдэр” ХХК 2,500,000
16. “Монголросцветмет” ТӨҮГ 2,000,000
17. “Монполимет групп” 1,000,000
18. “Багануур” ХК 1,000,000
19. “МоЭнКо” ХХК 1,000,000
20. “Платинум Ланд” ХХК 1,000,000
21. “Шивээ овоо” ХК 500,000

Ёслолд Монгол Улсын Ерөнхийлөгч У.Хүрэлсүх, Монгол Улсын Ерөнхий сайд, Уур амьсгалын өөрчлөлт, цөлжилтийг бууруулах үндэсний хорооны дарга Л.Оюун-Эрдэнэ, албаны бусад хүн оролцов.

Мод тарьж ургуулахаа баталгаажуулсан баялаг бүтээгчид, хувийн хэвшлийнхэнд Монгол Улсын Ерөнхийлөгч У.Хүрэлсүх талархал илэрхийлэв.

“Тэрбум мод” үндэсний хөдөлгөөн нь мод тарьж, ургуулах, хамгаалахаас гадна уур амьсгалын өөрчлөлт, цөлжилттэй эдийн засгийн зөв хөшүүрэг ашиглан тэмцэх, ажлын байрыг нэмэгдүүлэх, ядуурлыг бууруулах, хүнсний хангамжийг сайжруулахад тустай төдийгүй иргэдийн эрүүл, аюулгүй амьдрах орчинг бий болгох, хүнсний аюулгүй байдлыг хангахад чухал ач холбогдолтой” гэлээ.

Бизнес эрхлэгчид, баялаг бүтээгчид үүнд оролцох нь байгаль орчны доройтлоос үүсэх эрсдэлийг бууруулах, бизнесээ тэлэх, ногоон технологи, инноваци нэвтрүүлэх, байгаль орчинд ээлтэй ногоон санхүүжилт татах, дэлхийн хөгжлийн чиг хандлагатай хөл нийлүүлэх зэрэг чухал ач холбогдолтой гэж Монгол Улсын Ерөнхийлөгч үзэж байна.

Тэрээр “Тэрбум мод” үндэсний хөдөлгөөнд нэгдэх бүх байгууллага, аж ахуйн нэгж, иргэдийг төр, засаг бүх талаар дэмжинэ. Хамтдаа нэг зорилго, нэгдмэл хүчээр энэ зорилтыг бодит ажил хэрэг болгож чадна гэдэгт итгэж байна” гэв.