Бидний хайрт аав, эрхэм ах Н.Алтангэрэл 2022 оны 2 дугаар сарын 8-ны өдөр зуурдаар нас барж, үр хүүхэд, ах дүүс бидэнд хүнд гарз тохиолоо.

Н.Алтангэрэл нь 1946 онд Говь-Алтай аймгийн Дэлгэр сумын Баянбуурал бригадын Ихэрийн дээд бууцанд ард Намширын ууган хүү болон мэндэлжээ. Тэрээр улс орондоо 40 гаруй жил үр бүтээлтэй ажиллаж, эх орныхоо хөгжил цэцэглэлтэд өөрийн хувь нэмрийг оруулсан, хөдөлмөр зүтгэлээ үнэлүүлсэн нэгэн байлаа.

Н.Алтангэрэл нь Говь-Алтай аймгийн Авто тээврийн 7-аар Баазад жолооч, аймгийн тээврийн байгууллагуудын "Алтанжолоо чуулга"-ыг үүсгэн байгуулж, чуулгын Ахлагч, “Сэтгэмж” цогцолбор сургуулийн нярав зэрэг олон ажлыг хичээнгүйлэн хийж ирсэн билээ. Түүний хөдөлмөр зүтгэлийг төр засаг, хамт олон нь өндрөөр үнэлж ойн медалууд, “Осолгүй манлай” жолооч, “Онц тээвэрчин”, V, VI, VII, VIII таван жилийн гавшгайч, Соёлын тэргүүний ажилтан цол тэмдэг, Төрийн дээд шагнал "Алтангадас" одонгоор шагнаж, "Ард түмний гавъяат"-аар өргөмжилж байлаа.

Н.Алтангэрэл нь хамт олон, нутаг усныхан, гэр бүл, үр хүүхдүүд бидэндээ үлгэр дууриалалтай, хүнлэг энэрэнгүй сэтгэлтэй, хамт олныг зохион байгуулах болон урлаг соёлын авъяастай, бичгийн өндөр боловсролтой хүн байлаа. Тэрээр олон сайхан дууны шүлэг бичсэнээс “Сэтгэмж” цогцолбор сургуулийн Сүлд дуу, төрсөн нутагтаа зориулж бичсэн "Хонгор хайрхан" дуу нь олны сэтгэлд хүрсэн сайхан дуу болон дуулагдсаар байна.

Таныхаа нөмөр нөөлөг, ноён нуруу, хүнлэг нинжин сэтгэл, хөдөлмөрч зан чанарыг бид үргэлж санан дурсах болно. Та минь Алтан дэлхийнхээ ариун хөрсөнд амар тайван нойрс доо... 

Талийгаачийн гэр бүр, үр хүүхэд, ах дүү, анд нөхөд, төрөл төрөгсдөд гүн эмгэнэл илэрхийлье.