Улсын хэмжээнд Хоёрдугаар сарын 14-нөөс бүх шатны сургалтын байгууллагууд танхимаар хичээллэж эхэлнэ. 

Мөн 3-5 настнууд цэцэрлэгт бүрэн хамрагдах боломжтой болсон билээ. Тус насны хүүхдүүд цэцэрлэгт явахын тулд шээсний болон цагаан хорхойн шинжилгээ өгсөн байх ёстой байдаг.

Гэвч эцэг эх, асран хамгаалагч нарт шинжилгээ өгөх явц хүндрэл учруулж, хүүхдүүдийг гадаа дугаарлан зогсоход хүргээд байна. Энэ нь эргээд бага насны хүүхдүүдийг ханиад хүрэх, хоолой өвдөх зэрэг олон эрсдэлийг оруулж байна. 

Энэ асуудлаар Нийслэлийн Боловсролын газрын дарга Ж.Гантулгаас тодруулга авчээ. 

Тэрээр "Цэцэрлэгийн танхимын сургалт эхлэхтэй холбоотой цахим системд бүртгэлтэй гурван настнууд, 2021 оны арванхоёрдугаар сараас хойш цэцэрлэгтээ яваагүй 4-5 настнууд гээд нийт 41,000 орчим хүүхэд шинжилгээ хамрагдана. Шинжилгээг цэцэрлэгүүд дүүргийнхээ Эрүүл мэндийн төвүүдтэй хамтран зохион байгуулдаг. Энэ долоо хоногийн лхагва гаригаас эхлэн Эрүүл мэндийн төвүүдийн баг хуваарийн дагуу цэцэрлэгүүд дээр шинжилгээ авч байгаа. Тухайн дүүрэг, хорооны оршин суугчийн тооноос хамаарч ачаалал харилцах адилгүй байгаа. Зарим цэцэрлэг дээр бөөгнөрөл үүссэн байхыг үгүйсгэхгүй. Нийслэлийн Боловсролын газраас цэцэрлэгүүдэд хүүхдүүдийг гадаа оочерлуулж болохгүй, аль болох ачаалал үүсгэхгүй зохион байгуулах чиглэл өгсөн" гэлээ.

Шээсний болон цагаан хорхойн шинжилгээг цэцэрлэгүүд дүүргийнхээ эрүүл мэндийн төвтэй хамтран зохион байгуулж байна.