Бээжингийн өвлийн олимпыг зорьсон Монголын тамирчид тосгондоо төвхнөж, өнөөдрөөс бэлтгэлдээ ороод байна.
Хоёр хоногийн өмнө Монголын баг тамирчдын хүлээн авсан Олимпын хувцас дээр бичигдсэн MONGOLIA нэрний "G" үсэг "C" гэж буруу байгаа зураг цахим сүлжээгээр тарсан. Тухайн үед улсын нэрийг буруу бичсэн байсан гэх асуудалд Биеийн тамир, спортын газрын дарга Ц.Шаравжамц өртсөн билээ. Тэрээр анхны буюу туршилтын загварыг өмссөн байсан аж.
Гэвч энэ асуудал олон нийтийн сүлжээнд хурц сэдэв болж, шүүлжлэл дагуулсан юм.
Тэгвэл өвлийн олимпын наадамд оролцох баг тамирчдын хувцас хэрэглэлийг хариуцан ажилласан Michel&Amazonka компаниас дахин уучлалт хүсч, мэдэгдэл гаргалаа.
"УУЧЛАЛ ХҮСЭХ НЬ
Өвлийн олимпын хувцас хэрэглэлд парад дээл, бүс, гутал, малгай, куртка, цасны өмд, спорт гутал, ноосон цамц, ороолт, малгай, бээлий, оймс, үүргэвч, цүнх, чемодан, ханцуйтай болон ханцуйгүй футболк, комбинзон, үслэг малгай, хуруугүй бээлий, биеийн тамирын хослол, маск зэрэг 22 төрлийн бүтээгдэхүүний загвар дээр ажилласан. Үүнээс өвлийн олимпод хувцас хэрэглэлийн загварыг 13 бүрдэл хэсэгтэй сет болгон сонгон баталсан.
Загварын судалгаа зургуудаа гаргаад Зуны олимпын зарим элементүүдийг авч гар зургуудыг эхлээд гаргасан. Эцсийн загваруудыг гаргахад Зуны олимпод хэрэглэсэн өнгөөрөө дагнах буюу далбааны өнгө дээрээ тогтохоор шийдвэрлэсэн. Та бүхэнд эхний гар зургууд буюу өнгийг харуулж байна. Мөн өмнөх өнгөөр өөрчилж зурсан зургуудийг орууллаа.
Цаашид өнгөөрөө дагнах байдлаар өмнөх өнгөнүүдээ авч үлдэх болсон нь Dior загварын хувцастай ижил төстэй харагдуулж байгаад бид уучлал хүсч байна. Бидний алдаа!!!
Зуны олимпын ёслолын хувцас болох оргил загварын оргилыг төлөөлүүлсэн гурвалжин дүрсийг ноосон цамцанд оруулж доор нь MONGOLIA нэрээ Зуны олимпод хэрэглэсэн фонтын дагуу оруулсан нь нэхмэл бүтээгдэхүүн дээр C мэт харагдаж байгааг Монголын Үндэсний Олимпын Хорооноос анхааруулж буцаан авч засварласан. Хугацаа шахуу байсан тул Төрийн далбаа гардуулах ёслолд өмссөн нь олны шүүмлэлийг дагуулж Ц.Шаравжамц таньд хүндрэл учруулсанд уучлал хүсч байна" гэсэн байна.
