Зургийн эх сурвалж ulsturch.mn

Т.Ганболд, С.Баярцогт, Б.Бямбасайхан нарын хэргийг шийдвэрлэсэн Чингэлтэй дүүргийн Эрүүгийн хэргийн анхан шатны шүүхийн шүүгч Ё.Цогтзанданд Шүүхийн сахилгын хороо өнгөрөгч лхагва гаригт сахилгын хэрэг үүсгэжээ. Да.Ганболд нарын өмгөөлөгч Б.Баяраа шүүгч Ё.Цогтзандангийн нэр дээр дахин гомдол гаргасан байна.

Шүүгч Ё.Цогтзандан нь 2020 оны сонгуулийн үеэр УИХ-д нэр дэвшигч Да.Ганболд, С.Баярцогт, Б.Бямбасайхан нарт /Оюутолгойн гэрээний асуудлаар шалгагдаж байсан/ "гурав хоногийн дотор 10 тэрбум төгрөгийн барьцаа байршуулах” таслан сэргийлэх арга хэмжээ авч, шүүгдэгч нар барьцааны шаардлагыг хангаж чадаагүйн улмаас “эрүүгийн хэрэг хянан шийдвэрлэх ажиллагаанд саад учруулсан” гэх үндэслэлээр цагдан хорьсон билээ. 2020 оны УИХ-ын сонгуулиар зургаан дэвшигч хорих ангиас өрсөлдсөний гурав нь АН, нэг нь МАН-ын гишүүн, хоёр нь бие даагч байв.

Сонгуулийн дараа Да.Ганболд нарын өмгөөлөгч Б.Баяраа “Эрүүгийн хэрэг хянан шийдвэрлэх ажиллагаанд саад учруулах нөхцөл байдлыг санаатай үүсгэсэн, хууль бусаар цагдан хорьсон” үндэслэлээр шүүгч Ё.Цогтзанданг Шүүхийн сахилгын хороонд өгсөн юм байна. Гэвч шүүхийн сахилгын хороо уг гомдлыг гомдол гаргаснаас жил хагасын дараа буюу өнгөрөгч оны арванхоёрдугаар сард хэлэлцсэн байдаг.

Шүүгч Ё.Цогтзандан өмгөөлөгч Б.Баяраагийн гомдлоор Шүүгчийн ёс зүйн хороонд гаргасан тайлбартаа “МАН-ын нэр дэвшигчийг СБД-ийн Эрүүгийн хэргийн шүүхээс цагдан хорьсон. АН-ын нэр дэвшигч нар гадуур чөлөөтэй яваад байна гэж ард түмэн, хэвлэл мэдээллийнхэн хэл ам гаргаад байхаар нь цагдан хорьсон” гэсэн байдаг. Гэсэн ч уг гомдлыг шалгасан Сахилгын хорооны гишүүн Д.Эрдэнэчулуун /шүүгч Ё.Цогтзандангийн багын найз/ “Шүүгч Ё.Цогтзандан Эрүүгийн хэрэг хянан шийдвэрлэх хуулийн дагуу таслан сэргийлэх арга хэмжээг авсан, хууль зөрчсөн гэх үндэслэл байхгүй” гэж дүгнээд сахилгын хэрэг үүсгэхээс татгалзсан тухай өмнө мэдээлсэн.

Гэвч өмгөөлөгч Б.Баяраа Л.Эрдэнэчулууны гаргасан захирамжийг эсэргүүцэж, дахин гомдол гаргаснаар Шүүхийн сахилгын хороо шүүгч Ё.Цогзанданг сахилгын хэрэг үүсгэсэн байна. Үүгээр зогсохгүй өмгөөлөгчийн зүгээс Сахилгын хорооны гишүүн Д.Эрдэнэчулууны эсрэг шүүхэд нэхэмжлэл гаргахаар болсон байна. Нэгэнт байдал иймдээ хүрсэн болохоор дээрх маргаан нэлээдгүй өндөр авч, багагүй хугацаа туулах бололтой.

Харамсалтай нь, хорооны гишүүн Л.Эрдэнэчулууны тэтгэвэрт гарах хугацаа энэ оны гуравдугаар сард юм байна. Тэгэхээр түүнийг чөлөөндөө гарахаас урьтаж хуулийн болон мэргэжлийн хариуцлага хүлээлгэнэ гэдэг эргэлзээтэй болж байна. Магадгүй жил хагас дарсан гомдлоо гэнэт гаргаж ирээд хянасан нь ч гэсэн түүний тэтгэвэртээ гарах болсонтой холбоотой бололтой. Үлдэх хүнээр ачаа бүү татуул гэдэг дээ.