"Бээжин-2022" өвлийн олимпын наадамд оролцох Монголын баг тамирчид маргааш Бээжин хотыг зорих юм. 

Гэвч сошиал орчинд тамирчдын хувцас дээр бичигдсэн MONGOLIA нэрний "G" үсэг "C" гэж буруу, дутуу байгаа зураг тараад буй. Улсын нэрийг буруу бичсэн байна гэх асуудал олон нийтийн сүлжээнд хурц өрнөж, шүүлжлэл дагууллаа. 

Тэгвэл өвлийн олимпын наадамд оролцох баг тамирчдын хувцас хэрэглэлийг хариуцан ажиллаж байгаа Michel&Amazonka компаниас асуудалтай холбоотойгоор тайлбар, мэдэгдэл гаргажээ. 

Мэдэгдэлд, "Michel&Amazonka компаниа нь Монгол Улсын шигшээ багийн өвлийн олимпод өмсөх хувцас хэрэгслүүдийг хариуцан ажилласан. Уламжлал ёсоор нээлтийн өдөр буюу 2022 оны Хоёрдугаар сарын 4-ний өдөр албан ёсны зураг мэдээлэл тайлбарыг өгдөг билээ. Гэвч олон нийтийн сүлжээнд буруу ташаа ойлгогдохоор зураг мэдээллүүд гарч байгаа тул тамирчдын олимпын үеэр өмсөх хувцас хэрэглэлийн зургийг өнөөдөр урьдчилан нийтэлж байна.

Хувцас хэрэглэл нь эцсийн хувилбараар гарах хүртлээ хэд хэдэн удаагийн туршилтын загвар гарч байж батлагддаг. Тухайн сошиал орчинд тархсан зураг дээрх нь анхны загвар байгаа болно.

Монгол Улсын шигшээ багийн өмсөх ноосон хослолын эцсийн загвар дээрх G үсэг тодорхой харагдаж байгааг хавсаргасан зургаас харна уу.

Та бүхэнд үл ойлголцол үүсгэсэнд Michel&Amazonka хамт олны зүгээс хүлцэл өчиж байна.

Түүхий эд, материалын дутагдалтай хүнд үед үндэсний үйлдвэрлэлээ дэмжин биднийг сонгон хамтран ажилласан МҮОХ-нд талархал илэрхийлэхийн хамт Олимпын багийн хувцас хэрэгслийг урлах хүндэт үүргийг цаашид хичээнгүйлэн үргэлжлүүлэх болно" гэжээ.