Нийслэлийн цагдаагийн газар, нийслэлийн Мэргэжлийн хяналтын газар, "Таван толгой түлш" компанийн хамтарсан баг агаарын чанарын талаар мэдээлэл өглөө. 

Өнгөрсөн долоо хоногт төвийн зургаан дүүрэгт хяналт шалгалт явуулахад түүхий нүүрс хадгалж байсан дөрөв, зориулалтын бус буюу гялгар уут шатааж байсан гурван зөрчлийг илрүүлэн зогсоосон байна. Мөн түлэх зорилгоор хадгалж байсан 10.5 тонн түүхийн нүүрсийг хурааж, Амгалан дулааны станцад нийлүүлсэн байна. 

Мөн хугацаанд угаартсан талаар 17 дуудлага ирж, 37 хүн хүнд, хөнгөн байдлаар угаартаж эмнэлгийн тусламж авчээ. Харамсалтай нь нэг иргэн угаартан нас барсан байна.

Мэдээллийн үеэр ОББҮХ-ны Нарийн бичгийн дарга бөгөөд Ажлын албаны дарга Б.Алтанзул "Өнгөрсөн долоо хоногийн пүрэв, баасан гаригт агаарын чанар сайн байсан. Энэ нь 4 м/сек хүртэл салхитай байсантай холбоотой бөгөөд агаар дахь бохирдуулагч бодисуудын хэмжээ сийрэг байлаа. Харин амралтын өдрүүдэд агаар жаахан бохирдолтой байсан. Өнөө өглөөний 09:00 цагийн байдлаар Улаанбаатар хотын ихэнх цэгт агаар бага бохирдолтой хэмжээнд байсан" гэлээ.

Мөн агаарын чанарт хүхэр өндөртэй Евро-2 стандартын шатахуун, насжилт өндөртэй тээврийн хэрэгслүүд нөлөө үзүүлж байгаа гэлээ.