Замын-Үүдэд хөл хорио тогтоох тухай Улсын Онцгой комиссийн шийдвэр, Засгийн газрын тогтоолыг үндэслэн Улаанбаатар-Замын-Үүд чиглэлийн зорчигч тээврийн галт тэрэгний хөдөлгөөнийг өнөөдрөөс /2022.1.13/ зогсоожээ. Энэ тухай Улаанбаатар төмөр зам ХНН-ээс мэдээлсэн байна. Харин Улаанбаатар-сайншанд чиглэлийн галт тэрэгний хөдөлгөөн цаашид хэвийн үргэлжилнэ.
Цар тахлын үед хилийн боомтын үйл ажиллагааг хэвийн явуулах, экспорт, импортын ачаа тээврийг эрчимжүүлэх үүрэг бүхий Шадар сайдаар ахлуулсан Ажлын хэсэг Замын-Үүд боомтод ажиллаж, тодорхой зохион байгуулалтуудыг газар дээр нь хийгээд ирсэн. Энэ дагуу хоёр улсын дундын бүс дэх "0" цэгээс Замын-Үүд дэх "Бүс нутгийн ложистикийн төв"-д ирэх чингэлэгтэй ачааг хүлээн авах, ачиж явуулах бэлтгэл ажлыг "Улаанбаатар төмөр зам" ХНН хангаж байгаа юм байна.
Өчигдрөөс хилийн боомтын үйл ажиллагаа жигдэрч, 49 чингэлэг бүхий 1000 гаруй тонн ачаа барааг Эрээний боомтоос татан авсан бөгөөд хүнс болон бусад бараа бүтээгдэхүүн зэрэг бүх төрлийн ачаа байгаа аж. Харин өнөөдөр нийт 60 чингэлэг ачааг татан авсан байна.
