Долоо хоног бүрийн даваа гаригт Нийслэлийн Агаарын бохирдолтой тэмцэх газраас агаарын чанарын талаар мэдээлэл өгч байгаа билээ. 

Энэ үеэр Нийслэлийн Агаарын бохирдолтой тэмцэх газрын дарга Б.Пүрэвсүрэн дараах мэдээллийг өглөө. 

Тэрээр "Сайжруулсан шахмал түлш нэг шуудай нь 1,875 төгрөг байгаа бол түлээний мод нэг шуудай нь 6,000-7,000 төгрөгийн үнэтэй байна. Үүнээс шалтгаалаад галаа унтраалгүйгээр дээрээс нь шахмал түлшээ хийж, ноцолт биш уугилт их явагдаж байна. Энэ бол тулгамдсан асуудал болоод байна гэдэг саналыг иргэд хэлж байгаа. Жил ирэх тутам сайжруулсан шахмал түлшний хэрэглээ нэмэгдэж байна. Анх 300,000 тонныг хэрэглэж байсан бол одоо 700,000 тонн болсон. Стандартын зуухны худалдаа арав дахин багассан байна. Мөн халаалтын шийдлээ цахилгаанаар солих нь багассан" гэлээ.

Харин Агаар орчны бохирдлыг бууруулах үндэсний хорооны нарийн бичгийн дарга Б.Алтанзул дараах мэдээллийг өгөв.

Тэрээр "Агаар, орчны бохирдол буурахгүй байгаа нь хүний буруутай үйл ажиллагаанаас бас үүдэлтэй байна. Ердийн зууханд сайжруулсан шахмал түлш яаж шатаж байна вэ гэдэг дээр дүгнэлт гаргуулахаар ажиллаад эхэлсэн явж байгаа. Ердийн болон стандартын зууханд шахмал түлшийг түлэхэд ямар ялгаа гарч байгааг удахгүй танилцуулна.  Иргэд маань шахмал түлшээ аль болох уугиулахгүйгээр хурдан асаах нөхцөлийг бүрдүүлж, "Таван толгой түлш" компаниас өмнө нь өгч байсан галлагааны зааврыг дагахыг уриалж байна. Мөн ОББҮХ дотоод орчны агаарын чанарт хяналт тавьж байгаа. Зуух, ханан пийшиндээ зай завсар гарсан эсэхийг хянаж байгаарай. Иргэд өөрсдөө санаачлаад угаарын хий гаргахгүй байх нөхцөлийг бүрдүүлээч ээ" гэсэн юм.