Нийслэлийн Сонгинохайрхан дүүргийн 32 дугаар хороо, “Тавантолгой түлш” компанийн хашаанд сайжруулсан шахмал түлшний үйлдвэрийн гурван барилга шатжээ. Уг галын дуудлага нэгдүгээр сарын 6-ны 05.06 цагт нийслэлийн Онцгой байдлын газарт ирсэн байна. Дуудлагын дагуу Гал түймэр унтраах, аврах 18, 26, 30, 14, 29 дүгээр ангийн алба хаагчид ажиллаж, тархалтыг зогсоон, дөрвөн цагийн дараа бүрэн унтраажээ. Тус компани Улаанбаатар хотын 171 мянган айл өрхийн түлшийг өвлийн цагт хангадаг томоохон үйлдвэрийн нэг билээ.

Галын шалтгаан, нөхцөл байдал болон үйлдвэр шатсантай холбоотойгоор сайжруулсан түлш үйлдвэрлэх хүчин чадал доголдох эрсдэлтэй эсэх талаар “Тавантолгой түлш” компанийн Гүйцэтгэх захирал М.Ганбаатараас тодрууллаа.

-“Тавантолгой түлш” компанийн үйлдвэрт гар гарлаа шүү дээ. Нийслэлчүүдийн түлшний хэрэглээ тасалдах эрсдэл үүсэж байна уу, үйлдвэр хэвийн ажиллаж байгаа юу?

-Баруун бүсд нийт дөрвөн үйлдвэр ажилладаг. Үүний нэгдүгээр үйлдвэрийн хатаах шугамд гал гарсан. Хатаах шугам нь гурван шугамтай. Онцгой байдлын алба хаагчид дуудлагын дагуу ирээд 10.28 цагт галыг бүрэн унтрааж дууссан. Гал гарсан нэгдүгээр үйлдвэрийн нэг шугам үндсэндээ ажилгүй болсон. Үйлдвэрийн 10 шугамаас гурван шугам гал түймэрт өртсөн, долоон шугам хэвийн ажиллаж байна, Зүүн бүсийн нэмэлтээр нөөц хоёр шугам ажиллуулж нийт 17 шугам ажиллаж байна. Үйлдвэрийн үйл ажиллагаа доголдолгүй хүчин чадлаар хэвийн явагдаж байгаа бөгөөд түлшний нийлүүлэлт ч тасалдаагүй. Онцгой байдал болон Цагдаагийн газар галын дүгнэлтийг үндэслэн шалгалт хийж байна.

-Нэг шугамдаа өдөрт хэдэн тонн нүүрс үйлдвэрлэдэг вэ?

-Нэг шугамдаа өдөртөө 150 тонн түлш үйлдвэрлэх хүчин чадалтай. Зүүн болон баруун бүсийн үйлдвэр нийтдээ 3000-3600 тонн түлшийг өдөртөө үйлдвэрлэж нийслэлчүүдийнхээ хэрэглээнд нийлүүлдэг.

-Ажилтан албан хаагчдыг шилжүүлж ажиллаж байна уу?

-Зүүн бүсийн үйлдвэрт нөөц ажилтан байгаа учир тэндээ зохицуулалт хийгээд ажиллаж байгаа.

-Нийслэлчүүдийн хэрэглээ өдөртөө хэдэн тонны захиалгатай байдаг вэ?

-Өнөөдөр нийт 640 цэгээс 3080 тонны захиалга ирсэн. Нийлүүлэлт ямар нэгэн тасалдал байхгүй.

-Галын аюулгүй байдлаа хэр сайн хангаж ажилладаг юм бэ. Үйлдвэрт гал гарахад унтраах худаг усны асуудал дутагдалтай байгаа тал ажиглагдсан?

-“Тавантолгой түлш” компани бол шатах тослох материал үйлдвэрлэдэг. Эрсдэлийн зэрэг маш өндөр бүс. Хатаах шугам нь 180 градус бүхий түлшний чийгийг 18-20 хувиас 4-5 хувьд хүргэж хатаах зориулалттай. Ингэснээр агаарт тархах нүүрсний утаа, тоосонцорыг дөрөв дахин бууруулдаг. Энэ хэмд бага зэргийн өөрчлөлт гарахад уугих, асах эрсдэлтэй. Манайд гурван машин бүхий 25 бие бүрэлдэхүүнтэй галын анги ажилладаг. Энэ анги гал гарсан тохиолдолд галыг барих, нэмэлт хүч иртэл бусад хэсэг рүү гал алдалгүйгээр ажилласан. Гал түймрийг унтраахад таван ангийн 19 автомашин, 56 алба хаагч гурван цаг 40 минутын турш ажиллаж гал түймрийг унтраасан. Гал түймэрт сендвичэн обьектууд өртсөн тул үйлдвэрийн үндсэн тоног төхөөрөмжид гал бага орсон.

-Галд өртсөн шугамыг хэдий хугацааны дараа нөхөн сэргээх боломжтой вэ?

-Цахилгааны утас болон төмөр тоноглолд үзлэг хийгээд 14-20 хоногийн дотор нөхөн сэргээнэ.

-Гал гарах үед хүн гэмтсэн тохиолдол гарсан уу?

-Үйлдвэрийн ажилтан 31 настай эрэгтэй нурууны хэсэг, хоёр гарын алганы хэсэг түлэгдсэн эмнэлгийн байгууллагад хүргэгдсэн биеийн байдал хэвийн байна. Одоо үйлдвэрийн эмнэлгийн үзлэгт орж, эмчийн хяналтанд байж байна. Үйлдвэрт Нийслэлийн цагдаагийн газар, СХД-ийн цагдаагийн газар, МШУТ-ийн гал түймрийн шинжээчийн бүрэлдэхүүн ажиллаж байна. Урьдчилсан байдлаар хатаалгын цехээс үүсвэрлэн гал гарсан байх магадлалтай гэж үзэж байгаа.

Эх сурвалж: Өглөөний сонин